Айылҕа харыстабыла Маны аах

Ойуур IV пуорумугар түмүстүлэр

Бүгүн АГАТУ “ЛЕСТЕХ” ойуур комплексын массыыналарын уонна оборудованиетын оҥорон таһаарар ассоциация, СӨ Экологияҕа, айылҕаны туһаныыга уонна ойуур хаһаайыстыбатыгар министиэристибэтин , СӨ Бырамыысыланнаска уонна геологияҕа министиэристибэтин кытта Саха Өрөспүүбүлүкэтин Ойуур бырамыысыланнаһын IV пуорумун ыытта.

Пуорумҥа Арассыыйаҕа ойуур бырамыысыланнаһын сайдыытын, өрөспүүбүлүкэ ойуурун баайын билиҥҥи туругун, инвестиционнай бырайыактары дьүүллэстилэр.

Бу тэрээһиҥҥэ маһы соҕотуопкалыыр, маһы таҥастыыр тэрилтэлэр дириэктэрдэрэ, производственнай сыахтар маастардара, ойуур хаһаайыстыбатын үлэһиттэрэ, тутааччылар, технологтар, устудьуоннар кытыннылар.

Пуорум үлэтин “Маһы соҕотуопкалааһын” хайысханы салайар АГАТУ кафедратын бэрэпиэссэрэ, тэхиньиичэскэй наука дуоктара Игорь Григорьев иилээн-саҕалаан ыытта.

Туһааннаах үөрэх кыһатын ректорын э.т., биология наукатын дуоктара Валерий Федоров ойуур пуорумун арыйарыгар сүрүн болҕомто ойуур салаатын исписэлиистэрин бэлэмнээһиҥҥэ ууруллуохтааҕар туһаайда.

Ил Түмэн сис кэмитиэтин бэрэссэдээтэлэ Сахамин Афанасьев ойууру хайдах көмүскүүр наадатын уонна ойууру көдьүүстээхтик туһаныы ирдэнэригэр болҕомтону тарта. Дьыалабыай мас 1 куубун сыаната үрдээн эрэриттэн дьиксинэрин биллэрдэ.

СӨ экологияҕа миниистирин солбуйааччы Андрей Коноплев Саха сиригэр суоһуур ойуур баһаардарын кыһалҕатыгар анаммыт дакылаатыгар бу салаа үлэһиттэрин хамнаһа намыһаҕын бэлиэтээтэ. Кини этэринэн, былырыын 8 мөл гектар тыа умайбыт. Маныаха кини авиабаза үчүгэй үлэтин бэлиэтээтэ: “Авиабазабыт суоҕа буоллар иэдэйиэ этибит”, — диэтэ. Төһө да былырыын ойуурга улахан хоромньулаах баһаардар тахсыбыттарын да үрдүнэн, быйылгы дьылга ойууру уоттан харыстааһыҥҥа үгүөрү үп көрүллүбүтүн эттэ. Ойууру көмүскээччилэр 50 мөл гектар иэннээх сиргэ ойууру хааччыйаллар эбит.

Өрөспүүбүлүкэ иһигэр үлэлиир маһы таҥастааччылар “АЛМАС”, “Баргузин”, “ВЛК”, “Юпитер” эҥин курдук тэрилтэлэр баалларын, кинилэр быйылгы былааннарын, төһө киһи мас соҕотуопкатыгар үлэлиирин туһунан Бырамыысыланнас уонна геология министиэристибэтин департаменын кылаабынай исписэлииһэ А.Михайлова кэпсээтэ.  Анна Николаевна баар кыһалҕаларга тохтоото. Ол курдук, маһы тиэйиигэ суол суоҕа атахтыырын, сүрүн пуондалар эргэрбиттэрин, ойуур баһаардарын, фитосэртипикээт болдьоҕо кылгаһын уод.а. эттэ. М.К.Аммосов аатынан ХИФУ доцена Михаил Лавров “Саха Өрөспүүбүлүкэтигэр мас дьиэни тутуу сайдыытын тенденцията” дакылаатыгар үгүс ыйытыы киирдэ. Холобура, “Этажи” хампаанньа эспиэрэ учаастактаах ыал чэпчэки соҕус сыанаҕа хайдах туттуохтарын туһунан сүбэлэттэ.

Пуорум кыттыылаахтара салгыы онлайн дакылааттары истэллэрэ күүтүллэр. Ол курдук, Вьетнам, Иркутскай уобалас, Латвия уо.д.а быһа сибээскэ тахсыахтара.

Ойуур хаһаайыстыбатын тиэмэтигэр бэртээхэй баай ис хоһоонноох кинигэ быыстапката эмиэ тэрилиннэ.

Бэлэмнээтэ Женни Стрюкова

Хаартыска: АГАТУ пресс-сулууспата

 

0
0
Telegram @edersaas20