Суолталаах Үөрэх уонна наука

Ойуур хаһаайыстыбатын үлэһиттэрин бэлэмнээһин тус сыаллаах миэстэтин элбэтиэхтэрэ

Бүгүн Ил Дархан Айсен Николаев Арктическай судаарыстыбаннай агротехнологическай университет ректорын  эбээһинэһин быстах кэмҥэ толорооччу Валерий Фёдоровы кытта көрүстэ. 

Өрүттэр үрдүк үөрэх кыһатын сайдыытын уонна кэккэ идэҕэ бүддьүөттээх миэстэни элбэтии боппуруостарын ырыттылар.

«Федеральнай бүддьүөт миэстэтигэр үрдүк үөрэх кыһатыгар 1067 миэстэ бэрилиннэ. Онон сибээстээн биһиги өрөспүүбүлүкэттэн 160 тус сыаллаах миэстэни көрдүүбүт. Холобура, «электротехника уонна теплотехника» диэн идэлэргэ уонна ойуур хаһаайыстыбатын үлэтигэр  анал идэлээх исписэлиистэри бэлэмнээһин соруга турар. Ойуур баһаардарыттан эмсэҕэлээбит тыаны чөлүгэр түһэриигэ анал идэлээх исписэлиистэр наадалара — кэм ирдэбилэ», – диэн бэлиэтээтэ Валерий Фёдоров.

Маны таһынан, үрдүк үөрэх кыһата бэс ыйын 15 күнүгэр Владивосток куоракка «Приоритет 2030. Дальний Восток» диэн бырагыраамаҕа кыттарын дьүүллэстилэр.  «Агробиотехнопарк тэрийээри гынабыт. Онно сыыппара трансформациятыгар уонна технологическай урбаан хайысхатыгар үлэлэһэр былааннаахпыт», — диэн иһитиннэрдэ университет салайааччыта.

Бырагырааманы РФ үөрэхтээһин уонна наука, Уһук Илини сайыннарыы министиэристибэлэрэ  сүрүннүүллэр. Бу көҕүлээһин чэрчитинэн университеттарга эригийиэннэр наадыйыыларын учуоттаан туран, үөрэх ураты бырагыраамаларын олоххо киллэриэхтэрэ, чинчийэр лабораториялары тэрийиэхтэрэ, бэйэ оҥорон таһаарыытыгар туһуламмыт бырайыактарынан үлэлиэхтэрэ.

Елена ПОТОЦКАЯ, «Саха сирэ» хаһыат.

Хаартыска — Андрей Сорокин (СИА).

0
0
Telegram @edersaas20