Экология, айылҕаны туһаныы уонна ойуур хаһаайыстыбатын миниистирин солбуйааччылар Алексей Агеев уонна Яков Заровняев Москваҕа Ойуур хаһаайыстыбатын салайааччы солбуйааччытын Николай Кротовы кытта оробуочай көрсүһүүгэ кэлэр сыллааҕы үбүлээһин боппуруоһун дьүүллэстилэр.
Саха Өрөспүүбүлүкэтэ ойуур сыһыаннаһыытын эйгэтигэр бэриллибит боломуочуйалары толороругар федеральнай бүддьүөттэн 2019 сылга 873,6 мөл. солкуобай кээмэйдээх субвенция үбэ былааннанар. Бу кээмэй 2017 сыллаахха былааннаммыт үбүлээһинтэн 247 мөл. солкуобайынан элбэх. Эбии көрүллүбүт үп ойуур уотун умуруорууга, ойуур хаһаайыстыбатыгар уонна кэтээн көрүүгэ туһаныллар тиэхиньикэни атыылаһыыга ороскуоттаныаҕа. Ону тэҥэ ойуур маһын чөлүгэр түһэрии үлэтин ыытарга үбүлээһин эмиэ улаатта.
Санатан эттэххэ, Ил Дархан Айсен Николаев быйыл күһүн, алтынньыга, федеральнай биэдэмистибэ салайааччыта Иван Валентигы көрсөн, Саха сирин ойуурун уоттан харыстааһыҥҥа үөскээбит кыһалҕалары быһаарарга туруорсубута. Көрсүһүү түмүгэр И.В.Валентик өрөспүүбүлүкэ баһылыгын олохтоох этиитигэр сөбүлэһэн, субъекка бэриллибит боломуочуйалары кэмигэр уонна көдьүүстээхтик толорууну хааччыйар инниттэн үбүлээһин кээмэйин улаатыннарарга эрэннэрбитэ.
Н.Кротовтыын көрсүһүүгэ “Экология” национальнай бырайыак чэрчитинэн “Ойууру харыстааһын” федеральнай бырагырааманан кэлэр сылга 91 мөл. 763,6 тыһ. солкуобай суумалаах субвенция лимиитэ бигэргэннэ. Бу хайысхаҕа үбүлээһин бырагыраама үлэлиир кэмигэр, ол эбэтэр 2024 сылга диэри көрүллүөҕэ. Тэҥнэбилгэ бэлиэтээтэххэ, 2016 сыллаахха диэри Саха сиринээҕи ойуур хаһаайыстыбатын үбүлээһин бүттүүн былааннаммыт кээмэйэ 400 мөл. солкуобайтан ордубат этэ.
Василий НИКИФОРОВ, «Саха сирэ» хаһыат, edersaas.ru