Орто Халыма улууһун Березовка нэһилиэгэр турбут ойуур баһаарыгар «Нитчат» кэпэрэтиип Крикуновоҕа баар табатын кыһыҥҥы баазата, икки «Бураана», оттугун саппааһа, Байкал, Маяк уонна Нитчан учаастактарыгар баар бултуур үүтээннэрэ былдьанна.
edersaas.ru
— Хамыыһыйа барыллаан ааҕыытынан, 2 мөл. солк. кэриҥэ суумалаах хоромньу оҥоһулуна, — диир Тыа хаһаайыстабытын министиэристибэтин Хотугу үгэс буолбут салаа департаменын салайааччы Иннокентий Баланов. – Хотугу улуустарга кураан буолан, быйыл ойуур баһаара элбэх сиргэ турда. Биһиги Булуҥ, Дьааҥы, Үөһээ Халыма, Муома, Орто Халыма уонна Эбээн Бытантай табаһыттарын кытары сибээһи тута, билсэ олоробут. Ойуур баһаардара таба кыһын мэччийэр сирдэрин эмиэ хаптылар, хата, бу кэлиҥҥи нэдиэлэҕэ ардах түһэн, арыый хаптайбыт курдук буолла, дьоҥҥо-сэргэҕэ уонна табаҕа суоһаабат дэһэллэр.
Санатан эттэххэ, өрөспүүбүлүкэ үрдүнэн 80 мөл. гектар иэннээх таба мэччирэҥэ, ол иһигэр 30 мөл гектар кыһыҥҥы мэччирэҥ баар. Тыа хаһаайыстыбатын улуустардааҕы управлениеларын чахчытынан, бас билии көрүҥүттэн тутулуга суох 106 хаһаайыстыбаҕа барыта 177 152 таба баар. Олорго 1295 киһи (1051 табаһыт, 244 чуумсук) үлэлиир диэн Тыа хаһаайыстыбатын министиэристибэтин пресс-киинэ иһитиннэрэр.
Раиса Сибирякова, «Саха сирэ», edersaas.ru