Сүүһүнэн мөлүйүөн гектар иэннээх хара тыаҕа уот туруута төһөлөөх аймалҕаны, ороскуоту оҥорорун ким ааҕан сиппитэ баарай?
edersaas.ru
Чаҕылҕан охсуутуттан биитэр киһи сыыһа-халты туттуутуттан, ордук кураан дьылга, ойуурга баһаар күөдьүйэр куттала күүһүрэр. Тэриллибитэ быйыл 75 сылын туолбут “Ойууру салгынынан харыстыыр база” (“Авиалесоохрана”) судаарыстыбаннай бүддьүөт тэрилтэтэ (салайааччы Владимир Леонов) өрөспүүбүлүкэ ойуурун пуондатын «кытарартан» араҥаччылыыр аналын дьоһуннук толорор.
“Авиалесоохрана” саҥа тиэхиньикэнэн хааччыныыга таһаарыылаахтык үлэлээтэ. “Судаарыстыбаннай уонна муниципальнай наадыйыыга өҥөнү, үлэни хааччыйыыга уонна табаар атыылаһыытын эйгэтигэр хантараак ситимин туһунан” диэн 2013 сыл муус устар 5 күнүгэр ылыллыбыт федеральнай сокуон чэрчитинэн электроннай көрүҥүнэн сэттэ аһаҕас аукциону ыыппыта. Ол быһыытынан, хааччыйар хампаанньалары кытары түһэрсибит дуогабардары барытын толорон, сакаастаабыт тиэхиньикэлэрин аҕалтарда.
Ноҕуруускалара улахан буолан, ойуур баһаардарын утары охсуһарга туттуллар тиэхиньикэ бэрт түргэнник эргэрэр. Судаарыстыбаннай Дуума көҕүлээһининэн ыытыллар Ойуур национальнай пуорума, Саха Өрөспүүбүлүкэтин салалтатын туруорсуутунан, Сибиир уонна Уһук Илин киэҥ сирдээх-уоттаах, сайыҥҥы өттүгэр элбэх баһаар турар эрэгийиэннэригэр, чуолаан Красноярскай кыраайга, Иркутскай уобаласка итиэннэ Саха сиригэр баһаарынай тиэхиньикэ 70 %-а эргэрбитин билиммитин түмүгэр, бу тус сыаллаах үбүлээһин оҥоһуллара ситиһилиннэ. Ойууру уоттан көмүскүүр сулууспа матырыйаалынай-тиэхиньиичэскэй базатын хаҥатарга, ойуур баһаардарын утары охсуһарга туттуллар тиэхиньикэни саҥардарга улахан хардыы оҥоһулунна.
Раиса Сибирякова, «Саха сирэ» хаһыат, edersaas.ru