Саха сиригэр десантниктар уонна парашютистар ойуур баһаарыттан сэрэхтээх буолууга эрдэттэн бэлэмнэнэн эрчилиннилэр.
2023 сылга ойуур баһаарыттан сэрэхтээх буолууга бэлэмнэнии үлэтэ ыытыллар. Бу күннэргэ өрөспүүбүлүкэтээҕи «Авиалесоохрана» десантник-баһаарынайдарыгар уонна баһаарынньык-парашютистарыгар эрчиллиилэр ыытылыннылар.
СӨ Экология министиэристибэтэ иһитиннэрбитинэн, Бүлүүттэн, Сунтаартан, Мииринэйтэн, Амматтан, Бэрдьигэстээхтэн, Покровскайтан, Хаандыгаттан 30 үлэһит үөрэннэ. Итинтэн 10 — Сунтаардааҕы авиаотделение парашютнай бөлөҕүн курсааннара, 20 — өрөспүүбүлүкэ араас оройуоннарыттан авиаотделениеларга саҥа киирбит үлэһиттэр.
Баһаарынайдары бэлэмнээһин саас ыытыллар эбит буоллаҕына, быйыл күһүн эмиэ ыытылынна.
—Бүгүн десантник-баһаарынайдары уонна парашютистары бииргэ бэлэмнээһин барда. Бу икки атын-атын исписээлинэстэр: парашютист диэн дэгиттэр буолуохтаах. Парашютунан уот көрдүгэннээбит сиригэр да тиийиэн түһүөн сөп. Оттон десантник-баһаарынньык салгын аалыттан анал тэрилинэн сиргэ түһэр, — диэн быһаарар ПДПС ыстаарсай инструктора Павел Аржаков.
Үөһээттэн ыстана эрчиллиилэр Маҕаҥҥа ыытыллыбыттар. Бөртөлүөттэн тохтотор шнурдаах КС-К анал тэрилинэн сиргэ түһэ үөрэнии — үлэ булгуччулаах ирдэбилэ. Отут үлэһит биирдии бэйэлэрэ сэттэлиитэ ыстаммыттар. Иккитэ билсиһэ, үөрэнэ таарыйа. Иккитэ бөртөлүөттэн аһаҕас былаһааккаҕа. Үстэ бөртөлүөттэн ойуурга түһэргэ.
Саамай уустук кэнники ыстаныы буолбутун туһунан, Дьокуускайдааҕы авиаотделение ПДПС үлэһитэ (парашютнай-десантнай сулууспа) Саян Васильев этэр:
—Үөһээттэн 10 миэтэрэлээх быанан ыстанан саҕалаан баран, 40 миэтэрэлээххэ тиийдибит. Саамай уустук мастар быыстарынан, 40 миэтэрэлээх быанан түһүү буолар. Мас үрдүгэ 20-30 миэтэрэ.
Бу күн ойуур кытыытыгар баһаары умулларарга бөртөлүөттэн ыстана үөрэниини чочуйдулар. Биэдэмистибэттэн иһитиннэрбиттэринэн, авиаотделение отут үлэһитэ эрчиллии түмүгүнэн десантник-баһаарынай квалификациятын туппут.
Бу иннинэ Сунтаар авиаотделениетын парашютнай бөлөҕүн уон курсаана Хаҥалас улууһугар Ойго эрчиллибиттэр. Онно парашютист-баһаарынайдары бастаан бэлэмнииргэ, ирдэбилгэ арыый эппиэттиир диэн, былаһаакканы анаан талан эрчиллиини ыыппыттар.
Санатан эттэххэ, СӨ Ил Дархана Айсен Николаев өрөспүүбүлүкэтээҕи Авиалесоохрана штатын ахсаанын элбэтэр туһунан иһитиннэрэн турар.
Саас Бүлүү уонна Ньурба авиаотделениеларыгар профессиональнай парашютнай бөлөхтөрү бэлэмниир былааннаахтар. Маны таһынан, Авиалесоохранаҕа ойуур улахан баһаардарын умулларыыга салайааччылары бэлэмниир үөрэх ыытыллар. Бу хайысханан сүүс үлэһити бэлэмнииргэ былаан баар. Өссө Авиалесоохрана тоҕус үлэһитэ Москва уобалаһыгар Пушкиноҕа кэтээн көрөр лүөччүк (летчик-наблюдатель) үөрэҕэр барбыт. Бастакы бэлэмнээһин аҕыс ый ыытыллар.
Өрөспүүбүлүкэтээҕи Авиалесоохрана парашютнай-десантнай баһаарынай сулууспатыгар күн бүгүн 555 киһи үлэлиир, ол иһигэр 150 кэмиттэн-кэмигэр (сезоннай) үлэлээччилэр. Итинтэн тоҕус уона профессиональнай парашютист.
+1
+1
+1
+1
+1
+1
+1