Ыам ыйын 31 күнүнээҕи туругунан, ойуур баһаара Таатта улууһугар 40,00 га сиргэ турбут. Уоту умуруорарга 3 баһаарынай парашютист, 26 десантник, ойуур харыстабылын 11 үлэһитэ, 3 тиэхиньикэ тахсыбыттара. Хаар ууллан, харалдьык тахсыаҕыттан, өрөспүүбүлүкэҕэ уопсайа 14 ойуур баһаара бэлиэтэммит.
edersaas.ru
Киһи тиийбэт ыраах тайҕатын, уһук улуустары куосмас куйаарыттан спутнигынан кэтээн көрөллөр. Ол курдук, ИСДМ Рослесхоз 26 термоточканы Дьааҥы, Эбээн-Бытантай, Таатта, Томпо улуустарыгар булбут. Ойуур баһаарын уопсай иэнэ 22 910,00 га, онтон ойуура 15 130,00 га.
Ити умайыы тахсыбыт сиригэр нэһилиэктэргэ уонна экэниэмикэ эбийиэктэригэр куттал суоһаабат. Онно баһаары умуруорарга ороскуот уоттан тахсар ночооттон быдан үрдүк буолан, баһаартан сэрэхтээх буолууга, ыксаллаах быһыыны-майгыны сэрэтэр, тохтотор Бырабыыталыстыба хамыыһыйата уоту умуруоруу үлэтин тохтотто. Ол туһунан быһаарыныы ылынарга хамыыһыйа РФ сокуонугар олоҕурар.
Өскөтүн айылҕаҕа сылдьан, ойуур баһаарын көрдөххүтүнэ, эрэгийиэннээҕи диспетчерскэй сулууспаҕа 8-4112-44-74-76, эбэтэр ойуур харыстабылын быһа төлөпүөнүгэр 8-800-100-94-00 биллэриҥ диэн ыҥыраллар.
Биһиги корр., «Саха сирэ», edersaas.ru