Ойуур баһаарын сэрэтиигэ федеральнай үбүлээһин эбилиннэ

Бөлөххө киир:

Быйыл ойуур баһаарын сэрэтиигэ барыта 2,5 млрд солкуобай көрүлүннэ. Федеральнай киинтэн кэлэр үбүлээһин биэс төгүл үрдээтэ. Бу туһунан бүгүн Ил Дархан Айсен Николаев “Якутия, вперед!” биэриигэ иһитиннэрдэ.

Санатан суруйдахха, РФ бэрэсидьиэнэ Владимир Путин этиитинэн Саха сиригэр ойуур баһаарын сэрэтиигэ уонна ону туоратыыга үбүлээһин биэс төгүл эбиллибитэ. Итини таһынан өрөспүүбүлүкэ бэйэтин бүддьүөтүттэн үбүлээһини эмиэ үрдэппитэ. Урукку сылларга бу сыалга 600 мөлүйүөн солкуобай барар эбит буоллаҕына, быйыл уопсайа 2,5 млрд солкуобай көрүлүннэ.

Быйыл ойуур баһаарын сэрэтиигэ эрдэттэн бэлэмнэнии үлэтэ барбыта. Федеральнай киин өттүттэн үбүлээһин күүһүрбүтэ тута билиннэ. Ойуур хаһаайыстыбатыгар үлэһиттэри элбэттибит, анал тиэхиньикэлэри ыллыбыт. Ону сэргэ салгын тырааныспарынан ойууру кэтээн көрүү күүһүрдэ. Онон быйыл ойуур баһаарын таһаарбат туһугар үлэ күүскэ бара турар диэн көрөбүн.

Манна даҕатан эттэххэ, ыам ыйыгар тахсар баһаардар үгүстэрэ киһи дьалаҕай туттуутуттан бараллар. Бу чааһыгар дьон-сэргэ бэйэтигэр эппиэтинэс ылан эрэр дии саныыбын. Холобур, былырыын баччаларга 126 сиргэ ойуур баһаара тахсыбыт буоллаҕына, быйыл 16 сиргэ бэлиэтэннэ. Былырыын ыам ыйын бүтүүтэ 26 тыһыынчаттан тахса гектар сир уокка былдьаммыт буоллаҕына, быйыл 100 гектар сир умайда, – диэн бэлиэтиир Айсен Сергеевич.

Аграфена КУЗЬМИНА.

+1
0
+1
0
+1
0
+1
0
+1
0
+1
0
+1
0