РФ бырабыыталыстыбата эрэгийиэннэргэ ойуур баһаарын умуруорууга туһаммыт харчыларын толуналларыгар саппаас пуондаттан 1,7 млрд солкуобайы ыытыаҕа. Саха сирэ бу сууматтан 1 млрд 49 мөлүйүөн солкуобайы ылыаҕа. Бу туһунан бастакы вице-премьер Дмитрий Садовников Ойуур хаһаайыстыбатын федеральнай агентствотын уопсай мунньаҕын кэмигэр иһитиннэрдэ.
Көрүллүбүт үбүлээһин “Авиалесоохрана” уонна “Якутлесресурс” тэрилтэлэр кирэдьииттэрин сабыыга барыаҕа. Дмитрий Садовников бэлиэтииринэн, үбүлүээһин бу күннэргэ кэлэн, тэрилтэлэргэ барыаҕа.
– Ойуур хаһаайыстыбатын федеральнай агентствотын мунньаҕар эрэгийиэннэргэ саппаас пуондаттан ойуур баһаарын умуруорууга көрсүбүт ороскуоттарын сабыныыга эбии харчы көрүллэрин туһунан кэпсэтии барбыта. Саха сирэ 1 млрд 49,7 мөлүйүөн солкуобайы ылыаҕа, – диэн иһитиннэрэр Дмитрий Дмитриевич.
Санатан эттэххэ, быйыл өрөспүүбүлүкэбитигэр ойуур баһаарын умуруорууга барыта 15 тыһыынчаттан тахса олохтоох дьон кыттыбыттара. Бэйэ баҕатынан кыттыбыт дьоҥҥо анаан 235,5 мөлүйүөн солкуобай барыаҕа. Ону сэргэ тырааныспар ороскуотун толунууга – 128, тырааныспары арендалаһыыга – 59,5, атын эрэгийиэннэртэн кэлбит көмөлөһөөччүлэргэ – 460,8, авиахампаанньаларга – 165,8 мөлүйүөн солкуобай көрүллүөҕэ.
Аграфена КУЗЬМИНА