Суолталаах

Ойуур баһаарын бохсор суһал ыстаап мунньаҕа буолла

Бүгүн СӨ Бырабыыталыстыбатын Бэрэссэдээтэлин бастакы солбуйааччы Дмитрий Садовников быйылгы сылга ойуур баһаарын бохсор үлэни ыытар суһал ыстаап мунньаҕын тэрийэн ыытта.

СӨ Экология,  айылҕаны туһаныы уонна ойуур хаһаайыстыбатын миниистирин солбуйааччы, өрөспүүбүлүкэ кылаабынай лесничэйэ Андрей Коноплев иһитиннэрбитинэн,  2022 сыл ыам ыйын 1 күнүнээҕи туругунан  Амма, Чурапчы, Таатта, Мэҥэ Хаҥалас, Уус Алдан улуустарыгар хаар күүскэ ууллан, сир хараарда. Рослесхоз ИСДМ  систиэмэтэ бигэргэппитинэн, Ленскэй, Мииринэй, Уус Алдан, Сунтаар, Амма, Горнай уонна Бүлүү улуустарыгар уопсайа 17 уот барыытын туочукалара бэлиэтэннэ. Былырыын баччаҕа 40 «термо-туочука» баар эбит. Онно Амма, Уус  Алдан испииһэккэ суохтар эбит.

Маай бырааһынньыктарын кэмигэр дьон ойуурга тахсан кулуһуну уматалларын бохсор, сэрэтии үлэтин күүһүрдэргэ, нэһилиэнньэлээх пууннарга тыаҕа тахсан патруллааһыны тэтимирдэргэ сорудахтанна. Дмитрий Садовников күн-дьыл  туругун учуоттаан,  тустаах сулууспалар уот туруон сөптөөх сирдэригэр ураты болҕомтону ууралларыгар соруйда. Бары муниципальнай тэриллиилэр салайааччылара өртөөһүнү ыыппат туһугар үлэни ыытыахтаахтар уонна тустаах боппуроһу хонтуруоллуохтаахтар.

Бу туһунан СӨ Аҕа баһылыгын уонна Бырабыыталыстыбатын пресс-сулууспата иһитиннэрдэ.

Елена ПОТОЦКАЯ «Саха сирэ» хаһыат.

0
0
Telegram @edersaas20