«Якутлесресурс» САТ сакааһынан «Ростелеком» ПАУо Дьокуускайга уонна сүүрбэ улууска ойуур баһаарын мониторинныырга видеонан кэтээн көрөр «Лесохранитель» ситими туруорда.
edersaas.ru
Бу ситим сүүрбэ алта IP-камералаах уонна төгүрүк суукка устатыгар ыраахтан кэтээн көрөн, онлайнынан устар, этиҥтэн көмүскэнэр куорпустаах, -50°C тымныыттан +50°C куйааска диэри салгын температуратын тулуйар кыахтаах. Хас биирдии видеокамера 35 км иэннээх ойууру кэтээн көрөр, онон ханна буруо тахсыбыта, көрдүгэн баара, уот туран эрэрэ тута бэлиэҕэ ылыллар.
– Ойуур баһаарын туһунан чахчыны тута хомуйар суһал дьаһаллары тэрийэргэ олус наада, – диир «Якутлесресурс» генеральнай дириэктэрэ Дьулустаан Хон. – От ыйын 10 күнүгэр «Лесохранитель» видеомониторинг ситимин көмөтүнэн уон сиргэ, ол иһигэр Дьокуускай куорат таһынааҕы ойуурга, умайыы баара булуллан, тута боһойулунна. Итини таһынан уруккуттан баара бэлиэтэммит буруо тахсар 300 туочуката бэрэбиэркэлэннэ. Онон «Ростелеком» видеонан кэтээн көрөр ситимэ ойуур баһаарын саҥа үөскээн эрэр түһүмэҕэр көрөн, тэниппэккэ саба тутар, баай хара тыабытын кытарартан өрүһүйэр кыаҕы биэриэҕэ.
Раиса Сибирякова, «Саха сирэ» edersaas.ru