Уопсастыба

Ойуур баһаарыгар өрөспүүбүлүкэ үрдүнэн 1496 туонна от былдьанна

Өрөспүүбүлүкэ киин улуустарыгар ойуур баһаардарыттан уустук балаһыанньа үөскээтэ. Ол курдук, Амма улууһугар суһал быһыы-майгы эрэсиимэ биллэрилиннэ. Бу улууска 434,8 туонна кэбиһиллибит от уокка былдьанна. Ордук элбэх оту Соморсуҥҥа — 327,8 туоннаны, Эмискэ – 107 туоннаны баһаартан сылтаан сүтэрдилэр.

edersaas.ru

Мээндиги уонна Сулҕаччы таһыгар нэһилиэнньэ биригээдэлэри тэринэн, оту уоттан көмүскүүллэр. Амма улууһун салалтатын тыа хаһаайыстыбатын салаата ойуур уотун утары охсуһууга тахсыбыт.

Ойуур баһаарыгар өрөспүүбүлүкэ үрдүнэн 1496,5 туонна от былдьаммыта биллэр. Ол иһигэр: Таатта улууһугар – 463 туонна, Амма улууһугар — 434,8, Чурапчы улууһугар – 234, Уус- Алдан улууһугар 140,5, Нам улууһугар 118,2 , Мэҥэ- Хаҥалас улууһугар — 24 , Горнай улууһугар 62 , Томпо улууһугар — 18 туонна уонна Дьокуускай куорат таһыгар (Тулагыга) – 30 туонна от.

СӨ Тыа хаһаайыстыбатын миниистирэ Александр Атласов иһитиннэрбитинэн, СӨ Ил Дархана Айсен Николаев сорудаҕынан, ойуур баһаарыттан эмсэҕэлээбит хаһаайыстыбаларга көмө оҥоһуллуоҕа.

Бу көмөнү ыларга СӨ Тыа хаһаайыстыбатын министиэристибэтигэр уоттан эмсэҕэлээбит улуустар хоромньу кээмэйин ыйан, уокка былдьаныы туһунан туоһулуур докумуоннары хомуйан биэриэхтээхтэр. Көмөнү оҥоруу былырыын от ыйыгар ылыллыбыт 190 №-дээх  «О Порядке предоставления иных межбюджетных трансфертов из государственного бюджета Республики Саха (Якутия) местным бюджетам на создание условий для устойчивой зимовки скота и лошадей» ыйаах чэрчитигэр олоҕурар.

Егор Карпов, «Саха сирэ» хаһыат, edersaas.ru

0
0
Telegram @edersaas20

Добавить комментарий