Бүгүн, от ыйын 14 күнүгэр, Ил Дархан Айсен Николаев тэлэбиидэнньэнэн «Быһа кэпсэтиигэ» баҕа өттүнэн баһаары умулларыыга кыттыан баҕалаах дьон элбэҕин бэлиэтээтэ.
— Ким баҕалаах «Авиалесоохрана» уонна «Якутлесресурс» тэрилтэлэр филиалларыгар эбэтэр улуустар дьаһалталарыгар тахсан билсиэхтэрин сөп, — диэн эттэ Айсен Николаев. Маны тэҥэ Аҕа баһылык
ыччаттарга устудьуоннар этэрээттэрэ бүгүҥҥүттэн ойуур баһаарын бохсор биригээдэлэри тэрийбиттэрин иһитиннэрдэ. Ким баҕалаах онно тиийэригэр сүбэлээтэ.
«Баһаары умулларыы — кутталлаах үлэ. Онно сылдьар дьон анал ыйыыны-кэрдиини (инструктаж) ааһыахтаахтар. Ойуур баһаардара буола турар нэһилиэктэригэр эбии күүс, биллэн турар, олус наада», — диэтэ Ил Дархан.
Елена ПОТОЦКАЯ, «Саха сирэ» хаһыат, edetsaas.ru
Андрей Сорокин (СИА) хаартыскаҕа түһэриитэ