Ойуур баһаардарын умуруоруу үбүлээһинэ саҥа ырычааҕынан оҥоһуллар буолла

Айсен Николаев от ыйыгар ыытыллыбыт үлэ-хамнас туһунан кэпсииригэр биир сүрүн болҕомтону ойуур баһаардарын утары охсуһуу үлэтигэр уурда.

edersaas.ru

– Былырыыҥҥы курдук, ойуур баһаардара үгүс сиргэ, ол иһигэр, ордук хотугу улуустарга күүскэ турдулар, – диэтэ Ил Дархан. – Бу биричиинэтэ биллэр, олус кураан буолла, уһуннук куйаарда. Холобур, тымныы чыпчаалыгар, Дьааҥыга, халлаан 40 кыр. тиийэ итийэ сырытта. Ол түмүгэр, кураан этиҥнэрэ түһэннэр, баһаар турда. Биллэрин курдук, хотугу улуустарга, ыраах сытар учаастактарга, баһаары умуруоруу үгүс сыраны-хараны, түбүгү, улахан ороскуоту эрэйэр. Түгэнинэн туһанан, ойуур баһаардарын умуруорууга, бохсууга үлэлии сылдьар дьоҥҥо – ЫБММ, «Лесресурс», ойуур хаһаайыстыбатын, айылҕа харыстабылын тэрилтэлэрин исписэлиистэригэр уонна тустаах дьаһалталарга, нэһилиэктэр олохтоохторугар махтаныахпын баҕарабын. Кинилэр сыралаах үлэлэрин түмүгэр уот нэһилиэнньэлээх пууннарга суоһааһына таһаарылла илик. Билигин ордук уустук балаһыанньа Орто Халыма, Муома, Томпо уонна Уус Маайа улуустарыгар баар. Ханна наада буоларынан суһал дьаһаллары ылар сыалтан, күннэтэ, хас чаас аайы сводканы билсэ олоробун.

Арассыыйа Федерациятын Бырабыыталыстыбатыгар махтанабын: саамай тоҕостоох кэмигэр, ойуур баһаарын умуруорууга 480 мөл. солк. эбии көрүлүннэ. Быйыл муус устар 27 күнүгэр сааскы халаан уонна ойуур баһаарын боппуруостарыгар видеокэмпириэнсийэ киэбинэн ыытыллыбыт сүбэ мунньахха мин федеральнай бүддьүөттэн ойуур баһаардарын умуруорууга көрүллэр үбү эрэгийиэннэргэ тыырыы ырычааҕын саҥаттан көрөргө итиэннэ баһаары умуруорууга үлэлиир дьону босхо аһатарга этии киллэрбитим. Ону Владимир Путин өйөөн, ити харчы көрүллэрэ ситиһилиннэ.

Ойуур баһаардарын умуруорууга ананар үбү эрэгийиэннэргэ тыырыы саҥа ырычааҕа биһиэхэ эбии үп көрүллэригэр тирэх буолуоҕа. Дойду үрдүнэн ойуур баһаарын умуруорууга биир гектарга ортотунан 100 солк. көрүллэр буоллаҕына, саамай киэҥ сирдээх-уоттаах, элбэх ойуурдаах икки эрэгийиэҥҥэ үп намыһах ыстаапканан көрүллэрэ: Красноярскай кыраайга 8 солк, Саха сиригэр 6 солк. 90 харчы. Ити үлэни-хамнаһы олус атахтыыр, дьоҕус авиацияны көтүтэри хааччахтыыр этэ. Ол көннөһүллэр буолла.

Раиса Сибирякова, «Саха сирэ» edersaas.ru