Айылҕа харыстабыла

Ойуур баһаардарын умуруорууга баҕа өттүлэринэн көмөлөһөөччүлэр элбииллэр

Ойуур баһаардарын умуруорууга национальнай общиналар көмөлөһөллөр.

 

Ойуур баһаардарын умуруорууга бэйэлэрин баҕаларынан түмсэн көмөлөһөөччүлэр элбииллэр.
Ол курдук, бэҕэһээ, от ыйын 22 күнүгэр, «Саха сиригэр олорор таджиктар сойуустара» уопсастыбаннай организацияттан уон киһи  Хаҥалас улууһугар ойуур баһаардарын умуруорууга  көмөлөһө барарга туруммутун биллэрбиттэр. Бу туһунан А.Е.Кулаковскай аатынан норуоттар доҕордоһууларын дьиэтин саайтыгар суруллар. Кинилэргэ Дьокуускайга тэриллибит бэйэлэрин баҕаларынан көмөлөһө барааччылар уопсастыбаннай ыстааптарыгар анал сүбэ-ама оҥоһуллубут. Анал таҥаһынан, респиратордарынан, балааккаларынан, баһаары умуруорарга туттуллар тэриллэринэн, о.д.а. наадалааҕынан хааччыллалларгар түмсүү көмөлөспүт.
«Көмөлөөтөххө көмүөл мууһа кыайтарар». Бу кыһалҕалаах кэмҥэ көмө оҥоһулла турара санааны күүһүрдэр, улахан тирэх буолар. Ол курдук, киргизтэр диаспоралара бэйэлэрин баҕа өттүлэринэн көмөлөһөр уопсастыбаннай ыстаапка ас-үөл уонна ойуур баһаарын утары охсуһарга анал тэриллэри биэрбит. «СӨ нуучча общината» баһаары утары охсуһааччылары хааччыйарга наадалаах малынан-салынан (күрдьэҕинэн, сүгэнэн, бензопиланан, балааккаларынан, о.д.а.), тус бэйэ харыстанарыгар туһанар тэрилинэн (респиратордарынан, противогазтарынан, аптечкаларынан) аһынан-үөлүнэн, о.д.а. көмөлөспүттэр. А.Е.Кулаковскай аатынан норуоттар доҕордоһууларын дьиэтин үлэһиттэрэ харчынан өйөбүлү оҥорбуттар.
Ойуур баһаардарын умуруорууга көмөлөһөр дьоҥҥо махтал тыллара ананаллар.
1
0