Бүгүн, от ыйын 20 күнүгэр, «Саха» НКИХ ханаалыгар «Ил Дарханныын кэпсэтии» биэриигэ өрөспүүбүлүкэ баһылыга Айсен Николаев ойуур баһаарын туһунан сиһилии кэпсээтэ.
«Быйыл ойуур баһаардара хаһааҥҥытааҕар даҕаны эрдэ саҕаланнылар. Ол сүрүн төрүөттэрэ тугуй?» — диэн, биэрии ыытааччыта, «Саха» НКИХ дириэктэрэ Олег Марков ыйытта.
Ил Дархан Айсен Николаев:
— Кистэлэҥ буолбатах, Арассыыйа Арктикатын сиригэр салгын түргэнник сылыйа турар. Бу бастакынан. Иккиһинэн диэн эттэххэ, хаһан даҕаны буолбатах кураан буолла. Маннык сайын киин улуустарга, Бүлүү улуустарыгар хаһан даҕаны буола илик. Бэс ыйыгар киин улуустарга, Бүлүү улуустарыгар, илин эҥээргэ 2 мм эрэ ардах түстэ. Оттон нуорма — 37 мм. Ол аата 18 төгүл аҕыйах ардаҕы сирбит ылла. Ыам ыйыгар эмиэ аҕыйах ардах түспүтэ. Ол түмүгэр Саха сиригэр 150 сыл устатыгар буолбатах усулуобуйалар буоллулар. Сир-дойду барыта хатта. Онно өстүөкүлэ нөҥүө күн уота ааста даҕаны тута умайан тахсар буолла.
Дьон оту сыыһа өртөөн, кусчуттар, балыксыттар сыыһа туттаннар, 50-ча баһаар барбыта. Билигин уопсайа 1150 баһаар бара турар. Онтон 950-а кураанах этиҥтэн барбыт баһаардар буолаллар.