Ойуур баһаардарын умуруорууга Саха сиригэр эбии 480 мөл. солк. көрүлүннэ
РФ бырабыыталыстыбатын бэрэссэдээтэлэ Михаил Мишустин Арассыыйа ойуурун хаһаайыстыбатыгар 2020 сылга РФ бырабыыталыстыбатын саппаас пуондатыттан субъектарга 2614925,3 тыһ. солк. тыырар туһунан дьаһалга илии баттаата.
edersaas.ru
Бу үп-харчы ойуур баһаардарын умуруорууга аттарыллыаҕа. Саха сиригэр икки хайысханан 480 мөл. солк. үбүлээһин оҥоһулунна. Манна биири этиэххэ наада. СӨ Ил Дархана Айсен Николаев ойуур баһаардарын умуруорууга үп-харчы көрүллүүтүгэр дьаныардаах үлэтин түмүгэр ситиһилиннэ диэтэхпитинэ алҕаһаабаппыт буолуо. Ол курдук, муус устар 27 күнүгэр халааҥҥа уонна ойуур баһаарыгар анаммыт Владимир Путин ыыппыт сүбэ мунньаҕар, Ил Дархан Айсен Николаев ойуур баһаарын умуруорууга үбү көрүүгэ киэҥ сиринэн тайаан сытар ойуурдаах уонна баһаар турар куттала улахан эрэгийиэннэрин болҕомтоҕо ыларга эппитэ. Бэрэсидьиэн Владимир Путин Айсен Николаев этиитин кытары сөбүлэһэрин биллэрэн итиэннэ үбүлээһин ырычааҕын саҥаттан оҥорорго сорудахтаабыта.
СӨ Экологияҕа, айылҕаны туһаныыга уонна ойуур хаһаайыстыбатыгар миниистирэ Сахамин Афанасьевтан туһааннаах боппуруоска санаатын үллэһиннэ:
— Саха сирин ойуурун пуондата улахан буолан, үгүс ойуур баһаардарын умуруорууга авиация эрэ көмөтүнэн үлэ ыытыллар. Кэмигэр сөмөлүөттэринэн, бөртөлүөттэринэн парашютистары, десантниктары илдьэн баһаары умуруоруу түргэтиир. Ол гынан баран бу үгүс үбү-харчыны эрэйэр. Түгэнинэн туһанан, РФ бырабыыталыстыбатыгар, СӨ Ил Дархана Айсен Николаевка ойуур баһаардарын умуруорууга эбии харчы көмө быһыытынан көрүллүбүтүгэр махтанабын. — диэтэ.