Ойуур баһаардара: 37 умуруорулунна

Ааптар: Эдэр Саас

Бөлөххө киир:

Өрөспүүбүлүкэҕэ 103 ойуур баһаарын умуруорууга үлэ ыытыллар. 37 умуруоруллубут.

СӨ Экология министиэристибэтэ иһитиннэрбитинэн 19 оройуоҥҥа турбут ойуур баһаара 78 426,8 га иэннээх сири хаппыт. Бу Аммаҕа (1), Үөһээ Бүлүүгэ (11), Бүлүүгэ (9), Горнайга (12), Кэбээйигэ (6), Ленскэйгэ (3), Мэҥэ Хаҥаласка (5) Мииринэйгэ (6), Нерюнгригэ (1), Ньурбаҕа (11), Өймөкөөҥҥө (3), Өлүөхүмэҕэ (2), Сунтаарга (9), Тааттаҕа (1), Томпоҕо (2), Уус Маайаҕа (5), Хаҥаласка (5), Уус Алдаҥҥа (4) , Намҥа (1), Дьокуускай куорат сиригэр-уотугар (2), «Өлүөнэ очуостара» ураты харыстанар сиргэ (3), Өлүөхүмэҕэ заповедникка (1).

Итинтэн 10 оройуоҥҥа 20 ойуур баһаара (уот хаппыт иэнэ 19 395,6 га) бохсуллубут. Бу Аммаҕа -1, Үөһээ Бүлүүгэ 5, Бүлүүгэ -5, Ленскэйгэ -1, Намҥа -1, Ньурбаҕа -1, Сунтаарга -1, Мэҥэ Хаҥаласка -1, Уус Алдаҥҥа -1, Нерюнгригэ -1, «Өлүөнэ очуостара» ураты харыстанар сиргэ -2 .

Ойуур баһаарын умулларыыга 2 211 киһи, 279 көлө үлэлиир.

Ааспыт хонукка 4 448,2 га иэннээх сиринэн тайаабыт 37 ойуур баһаарын умуруорбуттар.

СӨ Экология министиэристибэтин ойуур харыстабылыгар департаменын салайар Владимир Иванов иһитиннэрбитинэн, куйаас күннэр сатыылаабыттара уонна этиҥнэр элбэхтэрэ, ойуур баһаардарыгар куттал үөскэтэр, быһыыны-майгыны уустугурдан биэрэр.

«Уот үксэ ыраах уонна уустук суоллаах-иистээх сирдэргэ турар. Олорго Экология министиэристибэтин ойуур баһаардарын умулларыга үлэлэһэр уонна Приморье, Хабаровскай кыраайдарыттан, Амур, Хакасия, Чита, Еврейскэй автономнай уобаластарыттан «Авиалесоохрана» ФБТ 349 исписэлииһэ үлэлиир«, — диэн кэпсээтэ.