Ойуур баһаардара аҕыйаабыттарынан уоту умулларааччылары ыыталаан эрэллэр
Баһаары утары өрөспүүбүлүкэ суһал ыстаабын атырдьах ыйын 24 күнүнээҕи сарсыардааҥы мунньаҕар иһитиннэрбиттэринэн, эрэгийиэҥҥэ бүгүҥҥү күҥҥэ 43 ойуур баһаара баар.
Суукка устата 130 тыһ. гектартан тахса иэннээх 12 баһаары умуруорбуттар, 677 гектартан тахса иэннээх 6 баһаары бохсубуттар.
Баһаарга 1475 киһи кыттыбыт, 164 тиэхиньикэни уонна 18 салгын суудунатын туһаммыттар.
Ойуур баһаарын умулларыы күүстээх үлэтэ Уус Маайа улууһугар барар, онно 12 баһаар баар. Бу улууска баар баһаары умулларыыга Бе-200 уонна Ми-8 үлэлээтилэр, 546 туонна ууну куттулар.
Өрөспүүбүлүкэҕэ баһаардар аҕыйаабыттарынан сибээстээн, уоту умулларааччылары өрүү маныыр миэстэлэриттэн түһүмэҕинэн ыыталаан саҕалаатылар. Суһал ыстаап чилиэннэрэ баһаары умулларыыга кыттыбыт дьоҥҥо барыларыгар махталларын биллэрдилэр итиэннэ нэһилиэк, улуус дьаһалтатын баһылыктара, бары суһал сулууспалар баһаарга быһаччы кытталларын элбэхтик көрбүттэрин бэлиэтииллэр.
СӨ Ил Дарханын уонна СӨ Бырабыыталыстыбатын пресс-сулууспата.
Хаартыска: СИА