РФ бэрэсидьиэнэ Владимир Путин атырдьах ыйын 14 күнүгэр быһа сибээһинэн ыыппыт мунньаҕар Ил Дархан Айсен Николаев ойуур баһаара барбыт улуустарыгар сайын устата турбут буруону сүрэх, тымыр, күөмэй ыарыылаах дьон, ордук аҕа саастаах көлүөнэ, ыараханнык аһарбытын бэлиэтээн туран, кинилэргэ санаторийга баралларыгар көмө наадатын эппитэ. Өрөспүүбүлүкэттэн бастакы бөлөх хомуллан, бүгүн Тюмень куорат санаторийыгар эмтэнэ барда.
Санаторийга барыыны Үлэ уонна социальнай сайдыы миниистиэристибэтэ тэрийэн ыытар. Миниистир Елена Волкова иһитиннэрбитинэн, бастакы бөлөххө ойуур баһаара турбут улуустарыттан барыта 180 киһи хомуллан, Тюмень куорат “Тараскуль” реабилитационнай киинигэр барда.
– Биэс улуустан (Горнайтан, Хаҥаластан, Уус Алдантан, Чурапчыттан, Бүлүүттэн) уонна Дьокуускай куораттан хомуллубут бастакы бөлөх бүгүн сарсыарда көттө. Манна дьарҕа ыарыыларынан балыыһаҕа учуокка турар, санаторийга, эмтэниигэ наадыйар дьон бардылар. Испииһэк улуустар киин балыыһаларынан Доруобуйа харыстабылын министиэристибэтинэн кииннэнэн оҥоһуллубута. Бастакы бөлөх Тюмень уобалаһыгар “Тараскуль” реабилитационнай кииҥҥэ баран доруобуйатын бөҕөргөтүнүөҕэ. Салгыы балаҕан ыйыгар өссө хас да бөлөх тэриллэн, Москва уобалаһын, Москва чугаһынаааҕы куораттар санаторийдарыгар барыахтара, – диэн бэлиэтиир Елена Александровна.
Манна даҕатан эттэххэ, РФ бырабыыталыстыбатын вице-премьерэ Татьяна Голикова бэрэсидьиэн Владимир Путин ыыппыт мунньаҕар Социальнай страховка пуондатын, Доруобуйа харыстабылын министиэристибэтин реабилитационнай кииннэригэр, санаторийдарыгар миэстэ баарын, Саха сирин кытары үлэлэһэргэ бэлэмнэрин бэлиэтээбитэ.
Бастакы бөлөх «АЛРОСА» авиахампаанньанан көттө. Кинилэри Тюмень аэропордугар «Тараскуль» реабилитационнай киин үлэһиттэрэ көрсүөхтэрэ. Бу санаторийы РФ Социальнай страховкатын пуондата көрөр. Санаторий Тараскуль диэн эмтээх бадарааннаах, уулаах күөлүнэн биллэр.
Аграфена КУЗЬМИНА, edersaas.ru