Өрөспүүбүлүкэ сиригэр-уотугар бүгүҥҥү күҥҥэ 4 ойуур баһаара баара биллэр.
Ол курдук, ойуур уота Өлүөхүмэ, Ленскэй, Өймөкөөн уонна Кэбээйи улуустарыгар умайар.
Кэбээйи оройуонугар кыра иэннээх баһаар баара бүгүн билиннэ. Өлүөхүмэ оройуонугар балаһыанньа кытаатта, ыксаллаах быһыы-майгы эрэсиимин биллэрдилэр.
Бу туһунан ойуур баһаарын сэрэтэр суһал ыстаап мунньаҕар иһитиннэрдилэр. СӨ Бырабыыталыстыбатын бэрэссэдээтэлэ Андрей Тарасенко уонна бырабыыталыстыба бэрэссэдээтэлин бастакы солбуйааччы Дмитрий Садовников улуус баһылыктарын кытта куйаар ситиминэн кэпсэттилэр.
Өлүөхүмэ оройуонугар бэс ыйын 3 күнүгэр Чапаево нэһилиэгиттэн 10 км сиргэ ойуур баһаара баара биллибитэ. Уот күөдьүйэн, 620 га сири сиэтэ, онтон 300 га — үөһээнэн сылдьар баһаар. Бэс ыйын 5 күнүттэн улууска баһаары бохсуу ураты эрэсиимэ олохтоммута. Билигин миэстэтигэр 62 киһи, 5 тиэхиньикэ үлэлиир. Оройуоҥҥа ардаҕы түһэрэр сөмөлүөт көттө.
Ленскэй оройуонугар хаһыс да күнүн ойуур баһаара Саха сирин уонна Иркутскай уобалас кыраныыссатыгар барар. Миэстэтигэр Авиалесоохрана 21 үлэһитэ үлэлиир.
Өймөкөөн улууһугар 50 га иэннээх сиргэ турбут баһаар урукку Победа бириискэ хоту өттүгэр бэлиэтэммитэ. Манна Авиалесоохрана 36 үлэһитэ үлэлиир. Баһаар этиҥтэн барбыт.
Бүгүҥҥү күҥҥэ Кэбээйи улууһугар бэлиэтэммит 7 га иэннээх ойуур баһаарыгар 5 парашютист үлэлиир.
Биир ойуур баһаара Сунтаар улууһун Тойбохой нэһилиэгин сиригэр-уотугар баарын бэҕэһээ салгын аалын патрулун кэмигэр көрбүттэрэ. Арктическай улуустарга 17 сиргэ ойуур уота турда.
Өрөспүүбүлүкэ кылаабынай лесничэйэ Андрей Коноплев бэлиэтээбитинэн, 903 га сиргэ 23 ойуур баһаара бэлиэтэннэ. Былырыын баччаҕа бу күҥҥэ 553 га иэннээх сиргэ 152 ойуур баһаара баара.
Елена ПОТОЦКАЯ, “Саха сирэ” хаһыат.
Андрей Сорокин, СИА.
