Ньурба улууһугар тахсыбыт ойуур баһаардарын утары охсуһууга бэйэлэрин кылааттарын киллэрбит оҕолору кытта көрсүһүү, чиэстээһин бэс ыйын 7 күнүгэр буолла.
Ньурба улууһугар кэлэн ойуур баһаардарын бохсор үлэлэри салайа, тэрийэ сылдьар Саха Ɵрɵспүүбүлүкэтин Бырабыыталыстыбатын Бэрэссэдээтэлин бастакы солбуйааччыта Дмитрий Дмитриевич Садовников уонна Ньурба улууһун баһылыга Алексей Михайлович Иннокентьев бүгүн Маарга уонна Хаҥаласка тахсан, ыксаллаах-быһыы майгы кэмигэр нэһилиэнньэлээх пууннары уоттан харыстааһыҥҥа кыттыбыт – Марха куустатын бары нэһилиэктэрин хааччыйар ВЛ-35 электрическэй подстанцияны быыһаабыт Маар оскуолатын 6 кылааһын үɵрэнээччитигэр Охлопков Алешаҕа, итиэннэ Хаҥалас сэлиэнньэтигэр куттал суоһаабытыгар улахан дьону кытта сэргэ ойуур баһаарын умуруорууга кыттыспыт Н.И. Кочнев аатынан I Хаҥалас оскуолатын 7 кылааһын үɵрэнээччитигэр Васильев Аркадийга уонна бу оскуола 9 кылааһын үɵрэнээччитигэр Анисимов Семеҥҥа бэйэлэрин ааттарыттан Махтал суруктары уонна бэлэхтэри туттардылар. Хорсун-хоодуот уолаттарга, маннык үтүɵ оҕолору ииппит кинилэр тɵрɵппүттэригэр, чугас дьонноругар барҕа махтал тыллара этилиннилэр. Бэлиэтээн эттэххэ, Охлопков Алеша ийэтэ Любовь Михайловна олохтоох дьаһалта үлэһитэ. Васильев Аркадий тɵрɵппүттэрэ, ийэтэ Вероника Владимировна учуутал, аҕата Александр Краснославович ох саанан ытыы кɵрүҥэр тренер. Оттон Анисимов Семен эбэтэ Зоя Васильевна Анисимова Хаҥалас нэһилиэгин урукку баһылыга, бас-кɵс киһитэ, оройуоннааҕы Сэбиэт депутата.
Ньурба улууһун дьоно-сэргэтэ дьиҥнээх патриот ыччаттарбытынан киэн туттабыт, кинилэр ыксаллаах быһыыга-майгыга кɵрдɵрбүт күүстээх санааларын, хорсун быһыыларын холобур оҥостобут.
«Ньурба оройуона» МО дьаһалтатын
пресс-сулууспата.