Саха сиригэр ойуур баһаарын бүгүҥҥү туругун өрөспүүбүлүкэ нэһилиэнньэтин олоҕор куттал суох буолуутун хааччыйар судаарыстыбаннай кэмитиэт бэрэссэдээтэлэ Дмитрий Лепчиков салалтатынан барбыт суһал ыстаап мунньаҕар көрдүлэр.
Хонук саҕаланыаҕыттан өрөспүүбүлүкэҕэ 26 га иэннээх 2 ойуур баһаарын умуруорбуттар. Хаҥалас уонна Ленскэй улуустарыгар 2 баһаары бохсубуттар.
Уон килэмиэтир иһинэн зонаҕа 7 ойуур баһаара баар, билигин ону умуруорууга суһал миэрэлэри ылаллар. Бу Ньурба улууһун Маар, Сунтаар улууһун Тумул, Үөһээ Бүлүү улууһун Булгунньахтаах, Томпо улууһун Хаандыга, Уус Маайа улууһун Белькачи бөһүөлэкэриттэн, Ленскэй улууһун Ленскэй куоратыттан тэйиччи учаастактарга уонна Өймөкөөн улууһун аэропордун чугас учаастактарыгар бэлиэтэнэллэр.
Өрөспүүбүлүкэҕэ, уопсайа, 9 улууска 9 ойуур баһаарын умуруораллар: Үөһээ Бүлүү, Ленскэй, Мииринэй, Ньурба, Сунтаар, Томпо, Өймөкөөн, Уус Маайа уонна Хаҥалас.
Саха сирин нэһилиэнньэлээх пууннарыгар баһаары киллэрбэтилэр. Билиҥҥи кэмҥэ нэһилиэнньэлээх пууннарга уонна экэниэмикэ эбийиэктэригэр куттал суоһаабат.
Баһаары умуруорууга Авиалесоохрана, ЫБММ, Якутлесресурс, ойуур хаһаайыстыбатын үлэһиттэрин ааҕан туран барыта 872 киһи кыттар. Күүһү атын сирдэргэ быраҕыы балаһыанньаны учуоттаан уонна Рослесхоз федеральнай эрэсиэрбэҕэ эбии күүстэрэ кэллэхтэринэ уларытылаан бириэхтэрэ.
Ону тэҥэ, 98 тиэхиньикэни, Дьокуускай куорат ойуурдарын салгынтан кэтээн көрүүгэ 14 сөмөлүөтү, 5 бөртөлүөтү туһаналлар, онон аһылыгы, ирдэнэр тэрили уонна ойуур баһаарын сирдэринэн дьону таһаллар.
СӨ Ил Дарханын уонна СӨ Бырабыыталыстыбатын пресс-сулууспата.