Сайыҥҥылыы күн-дьыл үүнэн, ойуурга уот турар кутталлаах кэмэ саҕаланна.
edersaas.ru
Ыам ыйын 19 күнүнээҕи туругунан, Чурапчы уонна Таатта улуустарыгар турбут, холбоон 10 гектар тыаны хаппыт баһаар бохсулунна. Бу иннинэ аҕай, Уус Алдаҥҥа уонна Хаҥаласка турбут, 5,5 гектардаах тыаны хаппыт, баһаар умулуннарыллыбыта. Бу үлэҕэ ойуур харыстабылын 23 үлэһитэ, биир ЫБММ үлэһитэ сырыттылар, үс анал тиэхиньикэ туһанылынна.
Уот турар кутталлаах кэмэ саҕаланыаҕыттан, өрөспүүбүлүкэ үрдүнэн биэс ойуур баһаара бэлиэтэннэ. Өрөспүүбүлүкэ ытыктабыллаах олохтоохторун уонна ыалдьыттарын, бөһүөлэк, бэйэ тиэргэнин иһигэр итиэннэ тыаҕа баһаартан сэрэхтээх буолуу быраабылаларын кыраҕытык тутуһаргытыгар, муҥутуур сэрэхтээх буоларгытыгар итиэннэ уот туран эрэрин көрдүгүт да эрэгийиэннээҕи диспетчерскэй сулууспаҕа (8-4112-44-74-76) эбэтэр ойуур харыстабытын суһал линиятыгар (8-800-100-94-00) биллэриҥ диэн Экология, айылҕаны туһаныы уонна ойуур хаһаайыстыбатын министиэристибэтэ иһитиннэрэр.
Раиса Сибирякова, «Саха сирэ» хаһыат, edersaas.ru