«Ангара» ХЭТ Алдан улууһун сиригэр-уотугар 54 538 гектар иэннээх ойуур учаастагын туһаныыга бырайыагын матырыйаалларын бэрэбиэркэлээһин үлэтэ түмүктэннэ.
edersaas.ru
Экспертизаны оҥорор судаарыстыбаннай хамыыһыйа үгүс кэһиилэри булла. Ол курдук, бастатан туран, бырайыакка быраап судаарыстыбаннай регистрациятын оҥоһуллубут күнэ-дьыла ыйыллыбатах. Иккиһинэн, суолу кыйа барар тыалар ааттара-суоллара, бэлиэлэрэ Арассыыйа Федерациятын Ойуурун кодексатыгар сөп түбэспэттэр. Үсүһүнэн, «Ойуур инфраструктуратын тэрийиигэ сыһыана суох эбиийэктэри тутуу, саҥалыы уларытан оҥоруу итиэннэ туһаныы» диэн салаа (раздел) суох. Төрдүһүнэн, «Кыылы-сүөлү, хамсыыр харамайы уонна уу эбийиэктэрин харыстабылын дьаһаллара» салаа оҥоһуллубатах. Ону таһынан, «ойуур харыстабылын, көмүскэлин уонна чөлүгэр түһэриллиитин тэрийэр дьаһаллар» диэн салаа элбэх итэҕэстэрдээх.
Онон, экспертиир хамыыһыйа бырайыагы үөрэтэн баран, «отрицательнай» түмүгү таһаарда уонна салгыы көрүүгэ ыытта. Бу туһунан Саха Өрөспүүбүлүкэтин Экологияҕа, айылҕаны туһаныыга уонна ойуур хаһаайыстыбатыгар министиэристибэтэ иһитиннэрэр.
Раиса Сибирякова, «Саха сирэ» edersaas.ru