Уус Алдан улууһугар, Бэрт Ууһун нэһилиэгэр, аҕам саастаахтар улууска, нэһилиэккэ ыытыллар тэрээһиннэргэ инники күөҥҥэ сылдьаллар. Ыаллыы улуустарыгар олорор саастыылаахтарын түмсүүлэрин кытары сибээһи туталлар. Үлэ үөрүйэҕин атастаһаллар, күрэхтэһиилэри тиһиктээхтик тэрийэн ыыталлар.
Нэһилиэк бэтэрээннэрин сүбэтин чилиэнэ Людмила Петрова көҕүлээһининэн, Саха судаарыстыбаннаһын тэрийсибит уһулуччулаах политическай диэйэтэл, саха сэбиэскэй литературатын төрүттээбит суруйааччы Былатыан Ойуунускай төрөөбүтэ 125 сылынан десант тэрийбиттэр. Бу туһунан биһиэхэ бэтэрээн учуутал Альбина Львовна Неустроева сырдатта:
—Нэһилиэкпит аҕам саастаахтарын түмсүүлэрэ быйыл күһүн Таатта улууһугар Чөркөөххө баран «Ойуунускай ыллыгынан» десаҥҥа кыттан, өрө көтөҕүллэн, үлэлиир баҕалара улаханнык күүһүрэн кэлбитэ. Ол чэрчитинэн, «Ойуунускай ыллыгынан десант — Уус Алдаҥҥа» диэн тэрээһин тэрилиннэ. Былатыан Ойуунускай төрөөбүт күнүгэр, таатталар ыыппыт ааҕыыларыгар, «Сайылык кыргыттара» түмсүүбүт олус үчүгэйдик бэлэмнэнэн кытынна. Ытык киһибит айымньыларын ис сүрэхтэриттэн долгуйан туран аахтылар. Салгыы нэһилиэкпит оскуолатыгар кэнчээрибит өйүгэр-санаатыгар Былатыан Ойуунускай туһунан дириҥник иҥэрэр сыаллаах-соруктаах бэлэмнэниллибит монтажпыт көрдөрүлүннэ. Оҕолору, учууталлары кытары атах тэпсэн олорон сэһэргэһии олус истиҥник-иһирэхтик барда.
Десаҥҥа П.А.Ойуунускай «Дорообо, туйгун кыыс Өрүүчэ» хоһоонугар ахтыллыбыт киэн туттар дойдулаахпыт, Саха АССР Үрдүкү Сэбиэтин депутата, «Бочуот Знага» уордьанынан наҕараадаламмыт ыанньыксыт Ирина Олесова төрөөбүт-үөскээбит Кыччама алааһыгар тахсан пааматынньыгар, скверигэр тыыннаах сибэкки дьөрбөтүн уурдубут. Манна бу бастыҥ үлэһит, ыанньыксыт олоҕун-дьаһаҕын, дьонун-сэргэтин, үлэтин-хамнаһын туһунан нэһилиэк ытык киһитэ, бэтэрээн А.Г.Колодезников ахтыы оҥордо. Ол кэнниттэн эдэр ыччакка П.Ойуунускай Кыччамаҕа кэлэ сылдьыбытын туһунан сырдаттыбыт. Түмүккэ оскуола оҕолоро «Дорообо, туйгун кыыс Өрүүчэ» хоһоону аахтылар.
Чараҥ бөһүөлэгэр Былатыан Ойуунускай кыттыылаах ыһыах ыһыллыбыт түһүлгэтигэр үктэнэн, кини тыл эппит трибунатыгар сүгүрүйэн, оччотооҕу кэми ахтан-санаан ааһыы ураты долгутуулаах буолла. Салгыы В.А.Протодьяконов-Кулантай аатынан литературнай мусуойга нэһилиэнньэни кытары көрсөн ирэ-хоро сэһэргэһии, инники былаан туһунан сырдатыы үлэни салгыы сайыннарарга тирэх буолла.
Бу үлэбитин биһиги бары кэнчээри ыччат өйүгэр-санаатыгар иҥэрэр сыаллаах, үлэни-хамнаһы өрө көтөҕүллүүлээхтик салгыырыгар эрэллээх тэрийэн ыытабыт. Маныаха түмсүү үлэтин куруук өйүүр нэһилиэкпит дьаһалтатыгар, оскуолабыт, кулууппут, бибилэтиэкэбит кэлэктиибигэр махтанабыт.
Альбина Львовна бу көмөлөөн тэрийэр үлэлэрэ кэлин ордук кэнчээри ыччакка туһалаах буолуоҕар эрэнэрин биллэрэр.
Сардаана БАСНАЕВА, «Саха сирэ» хаһыат, edersaas.ru
+1
+1
+1
+1
+1
+1
+1