Ойуунускай  төрүттээбит сойууһун үбүлүөйэ

Бөлөххө киир:

Өрөспүүбүлүкэ биир кырдьаҕас айар холбоһуга – Саха сирин суруйааччыларын сойууһа тэриллибитэ 85 сылын бэлиэтээтэ.


Саха сирин суруйааччыларын сойууһа 1934 сыллаахха төрүттэммитэ, бастакы бэрэссэдээтэлинэн Былатыан Ойуунускай талыллыбыта.

Бу ааспыт сыл үбүлүөйгэ бэлэмнэнии чэрчитинэн үлэ-хамнас ыытылынна. Ол курдук, быйыл “Үрүҥ хаар алгыһа” норуоттар икки ардыларынааҕы бэстибээл, Азербайджан поэзиятын күннэрэ, “Тыыннаах автограф”, кинигэлэр сүрэхтэниилэрэ, ааҕааччылардыын көрсүһүүлэр, норуодунай суруйааччылар үбүлүөйдэрин бэлиэтээһин, эдэр суруйааччылар сэминээрдэрэ, о.д.а. ыытылыннылар. Кэлэр сыл Эдэр суруйааччылар сүбэ-мунньахтара, Казах поэзиятын күннэрэ буолаллара былааннанар. Кэлэр сылларга билигин айа-тута сылдьар аҕа көлүөнэ суруйааччылар: Василий Егоров-Тумарча 85, Павел Харитонов-Ойуку уонна Андрей Кривошапкин 80 саастарын туолаллар.

Үөрүүлээх мунньахха Арассыыйа Суруйааччыларын сойууһун 1-кы сэкирэтээрэ, Өксөкүлээх Өлөксөйү уонна Семен Даниловы тылбаастаабыт Геннадий Иванов кыттыыны ылла. Кини “Судаарыстыба айар холбоһуктары өйүүр сокуону ылынарыгар уолдьаста. Аныгы ааптардар, ол иһигэр национальнай өрөспүүбүлүкэлэр суруйааччыларын кинигэлэрин хото бэчээттэтэн, сойуустары үбүлээн, бэстибээллэри, куонкурустары ыытан, култуураны, духуобунаһы өрө тутуохтаах”, — диэн туран, Арассыыйа Суруйааччыларын сойууһун былааҕын уонна Анна Ахматова бюһун Наталья Харлампьеваҕа туттарда.

СӨ Ил Дарханын уонна бырабыыталыстыбатын дьаһалтатын салайааччы Афанасий Владимиров Айсен Николаев эҕэрдэтин ааҕан иһитиннэрдэ, Махтал суругун туттарда.

Саха сирин суруйааччыларын сойууһа аан бастаан Ойуунускай аатынан мэтээллэри олохтоон, үрдүкү наҕараадаларын туттарда. Бастакы наҕараадаламмыт суруйааччыларынан Николай Лугинов уонна Елена Слепцова-Куорсуннаах буоллулар. Оттон сыл аайы ананар “Бастыҥ литературнай улуус” аатын Нам улууһа ылла.

Василий Шукшин аатынан кыһыл көмүс мэтээлинэн Павел Харитонов-Ойуку, Василий Васильев-Харысхал наҕараадаланнылар.

Татарстантан Газинур Мурат, Рифат Салах, Ленар Шаех, Казахстантан Даулеткерей Капулы, Азербайджантан Акбер Гошалы, Аида Эйвазова, Литературнай институт ректора Алексей Варламов, Москваттан Владимир Еременко, уо.д.а. суруйааччылар доҕотторугар видео эҕэрдэлэрин тиэртилэр. Салгыы суруйааччыларга судаарыстыбаннай наҕараадалары туттардылар, үтүөлээх ааттары иҥэрдилэр. Ол иһигэр эбээн тылынан бастакы романы суруйбут Андрей Кривошапкиҥҥа Ил Дархан Бочуоттаах грамотатын туттардылар.

“Бичик” кинигэ кыһатын дириэктэрэ Август Егоров сойуус Арассыыйа уонна омук суруйааччыларын кытары сибээһи бөҕөргөтөр үлэтин бэлиэтээн туран, кыһа анал бириэмийэтин норуодунай суруйааччы Наталья Харлампьеваҕа туттарда. Национальнай кинигэ кыһатын өйүүргэ судаарыстыбаннай субсидия сарбыллыбатаҕар кини улахан өҥөлөөҕүн ыйда.

Ангелина Васильева, “Саха сирэ” хаһыат, edersaas.ru

Мария Васильева хаартыскаҕа түһэриилэрэ.

+1
0
+1
0
+1
0
+1
0
+1
0
+1
0
+1
0