Бүгүн, СӨ Судаарыстыбаннаһын үрдүк үөрүүлээх күнүгэр, саха норуотун ньургун уола Былатыан Ойуунускай пааматынньыгар тыыннаах сибэкки дьөрбөтө уурулунна.
СӨ салалтатын уонна бырабыыталыстыбатын аатыттан бу бэлиэ күнүнэн Афанасий Владимиров эҕэрдэтин тиэртэ. Кини саха норуотун чулуу уолаттара Максим Аммосов, Былатыан Ойуунускай уонна кинилэр соратниктара биир сомоҕо буолан, биир өйүнэн-санаанан салайтаран, саха норуотун дьылҕатын сайдар суолга бигэтик киллэрбиттэрин киэн туттан бэлиэтээтэ.
—Элбэх сыллар усталарыгар Саха сирэ иннин диэки дьулуруйар, сайдар. Күн бүгүн бырамыысыланнас, тыа хаһаайыстыбата иннилэрин диэки дохсун хардыыны оҥороллор, социальнай эйгэ өйөнөр. Бүгүҥҥү өрөгөйдөөх, үөрүүлээх күнү көрсө, Сахабыт сирин олохтоохторо култуура, үөрэх, спорт эйгэлэригэр улахан ситиһиилэри аҕаллылар. Бу, мин санаабар, өрөспүүбүлүкэбит дьоно-сэргэтэ бары хайысханан сайдарыгар тэриллэр усулуобуйа кыаҕы биэрэр, тирэх буолар. Биһиги Сахабыт сирэ өрүү да бу курдук Уһук Илиҥҥэ бастыҥ субъегынан, Арассыыйаҕа биир саамай чаҕылхай сиринэн-уотунан, атыттарга үтүө холобур буола турарыгар баҕарабын, — диэтэ Афанасий Владимиров.
СӨ Ил Дархан уонна Бырабыыталыстыба пресс-сулууспата
Хаартыскаларга Андрей Сорокин (СИА) түһэриилэрэ.