Бүгүн Орто Халыма улууһун Ойуһардаах сэлиэнньэтигэр Улуу Кыайыы 77 сылынан сэргэх тэрээһин ыытылынна.
—Бу долгуйа күүтүүлээх тэрээһиҥҥэ күммүт кытары үөрбүттүү чаҕылыччы тыкта, — диэн иһитиннэрэр Ойуһардаахтан нэһилиэк бэтэрээннэрин сэбиэтин бэрэссэдээтэлэ Галина Шкулева. — Олохтоох мусуойбут таһыгар, Лаптевтар искибиэрдэригэр, дьон-сэргэ сарсыардаттан тоҕуоруста, үөрүү-көтүү өрөгөйдөөтө. Нэһилиэк олохтоохторо «Өлбөт үйэлээх полк» патриотическай аахсыйаҕа кыттан, дьоннорун-сэргэлэрин, эһэлэрин, эбэлэрин мэтириэттэрин тутан сэлэлии хаамыылара сүргэни көтөхтө. Салгыы буолбут параады эдэр ыччат сэргээтэ, дохсун ытыс тыаһынан арыаллаата. Бу параакка көлөлөргө сэрии сылларын оҕолоро, бочуоттаах сынньалаҥҥа олорор ытык кырдьаҕастар олорон искибиэргэ кэллилэр. Манна мустубут дьоҥҥо нэһилиэк баһылыга Елизавета Жиркова истиҥ эҕэрдэтин тиэртэ, бары үтүөнү баҕарда.
Салгыы сэргэх күрэхтэһиилэр дьону-сэргэни түмэ тартылар. Ол курдук, уһуйааннар иитиллээччилэригэр, оскуола үөрэнээччилэригэр саастарынан арааран ыытыллыбыт уруһуй куонкуруһун түмүгүнэн бириистэр туттарылыннылар. Оттон хаартыскаҕа түһэр сирдэри тэрийиигэ күүрээннээх күрэхтэһии түмүгүнэн, оҕо саадын кэлэктиибэ бастаан үөрүү-көтүү буолла. Саллаат хааһытын амсайыы эмиэ ураты буолла. Ол кэнниттэн, «Арчы» дьиэтигэр нэһилиэк ытык-мааны кырдьаҕастарыгар мааны астаах сандалы тэрилиннэ, остуол оонньуутун арааһа ыытылынна, көр-нар көҕүлүттэн тутулунна. Мантан киэһээ ырыа-тойук, үҥкүү-битии күүтэр, кэнсиэр бэртээхэйэ ыытыллыахтаах.
Хаартыскалар Е.Винокурова түһэриилэрэ.