Ойуһардаах оскуолата аахсыйа тэрийдэ

Ааптар: 
Бөлөххө киир:

«Норуот күүһэ — көмүөл күүһэ». Ити курдук ууттан эмсэҕэлээбит Дьааҥы, Кэбээйи улуустарыгар көмөлөрүн орто халымалар эмиэ биллэрэллэр.

Ол курдук, Степан Горохов аатынан Ойуһардаах орто оскуолата үс күннээх аһымал аахсыйа тэрийдэ. Манна үлэһиттэр, үөрэнээччилэр кытталлар. Оҕуруот аһын үүннэрэр лааҕыр оҕолоро бэйэлэрэ бүөбэйдээн үүннэрбит оҕуруоттарын аһын олохтоохторго атыыга таһаардылар. Кинилэр маны таһынан, бурдук ас арааһын астаан эмиэ үп-харчы киллэрдилэр.

Икки күн түмүгүнэн 10 тахса тыһыынча киирдэ. Бэлиэтээн эттэххэ, Ойуһардаах орто оскуолата оҕону үлэнэн иитиигэ сүрүн болҕомтотун уурар. Иитэр-үөрэтэр үлэ агрохайысханан барар. Оскуола күн бүгүн 80 үөрэнээччилээх. Үөрэх кыһата оҕуруоту таһынан аҕыс ыанар ынахтаах, түөрт торбостоох. Онон Ойуһардаах оҕолоро үлэни итиэннэ сынньалаҥы дьүөрэлээн, уһун өрөбүллэрин туһалаахтык атаараллар. Оҕуруот аһын үүннэрэллэр, үлэ лааҕырыгар сылдьан оскуола хаһаайыстыбатыгар быйылгы былаанынан 100 туонна оту оттуохтара.

Евдокия Винокурова,
С. Н.Горохов аатынан Ойуһардаах орто оскуолатын учуутала

+1
0
+1
0
+1
0
+1
0
+1
0
+1
0
+1
0