Аныгы кэм «Аанчыктарын» киһи аһынар: ким эрэ ханна да барар-кэлэр сирэ, көмүскэтэр-хараһыйтарар киһитэ суох уонна эриттэн бары өттүнэн тутулуктаах буолан, кырбанарын, атаҕастанарын тулуйан олороохтуур, ким эрэ бүтэр уһугар тиийэн, дьэ, уорганнарга үҥсэргэ күһэллэр.
Мэҥэ Хаҥалас улууһун полициятыгар 33 саастаах дьахтар сайабылыанньа суруйбут. Кэргэнэ кырбаабытын туһунан.
Оперативниктар ол 33 саастаах киһийдэҕи туппуттар.
Барыллаан быһаарыынан, ыал аҕата ааттаах киһийдэх ойоҕун электрическэй фильтр сунуурунан кырбаабыт. Ону таһынан, эркиҥҥэ тиийэн түһүөр диэри күүскэ саайбыт, хаста да төбөҕө охсубут. Ити барыта кыра саастаах оҕолоро көрөн турдахтарына!
Дьолго, дьахтар биир түгэҥҥэ мүлчү туттаран, оҕолорун кыбыммытынан аймахтарыгар куоппут. Онтон балыыһаҕа тиийэн көрдөрбүтэ — этэ-сиинэ бүтүннүү көҕөрбүтүн ааһан, мэйиитэ доргуйбут.
Бу чахчынан РФ Холуобунай кодексатын 119-с ыст. 1 чааһынан, ол эбэтэр, өлөрөрүнэн биитэр эчэтиинэн суоһурҕаныы бэлиэтэ баарынан, холуобунай дьыала тэрилиннэ.
Бу туһунан СӨ ИДьМ-тын пресс-сулууспата иһитиннэрдэ.
Биһиги корр., «Саха сирэ» хаһыат, edersaas.ru
Хаартыска: интэриниэттэн.