Иһэр-аһыыр, барар-кэлэр сирэ суох буолбут киһи буруйу оҥороро дөбөҥ. Этэргэ дылы, сүтэрэрэ суох.
Дьокуускай куорат полициятыгар биир дьиэҕэ консьержканан үлэлиир дьахтартан сайабылыанньа киирбит. Кини үлэлиир сириттэн суумкатын уорбуттарын туһунан. Онно 6800 солк. харчыта уонна докумуоннара бааллара үһү.
Оперативниктар бу уорууга уорбаланааччыны туппуттар — Амматтан төрүттээх, урут сууттана сылдьыбыт 35 саастаах киһи эбит.
Уорбаланааччы билиммитинэн, ойоҕунаан арахсыбыттарын кэнниттэн, ойоҕо кинини дьиэтиттэн үүрбүт. Инньэ гынан, итирик муҥнаах хонук сирин көрдөөн, бастакы түбэһиэх дьиэ подъеһыгар киирбит уонна онно саамай үөһээ этээскэ тахсан утуйбут.
Ону түүн олохтоохтор уһугуннаран, мантан барарын көрдөспүттэр. Аллара түһэн баран, консьержка түөтэ утуйа сытарын көрөн, аргаайдык үөмэн киирэн, суумкатын уорбут уонна тахсар ааны былдьаспыт.
Ол тахсан, суумканы уонна докумуоннары бырахпыт, оттон харчытыгар арыгы атыыласпыт.
Бу чахчынан «уоруу» ыстатыйанан холуобунай дьыала тэриллибит.
Бу туһунан СӨ ИДьМ-тын пресс-сулууспата иһитиннэрдэ.
Биһиги корр., «Саха сирэ» хаһыат, edersaas.ru
Хаартыска: интэриниэттэн.