Ойоҕун уонна 5 ыйдаах оҕотун өлөрөрүнэн суоһурҕаммыт киһини туттулар (ВИДЕО)
Дьокуускай куорат биир эдэр ыалыгар олус кутталлаах быһыы-майгы үөскээбитин, полиция үлэһиттэрэ кэмигэр кэлэн быыһаатылар. Онтон атын улахан иэдээн тахсыа эбит…
Бу быһылаан туһунан СӨ ИДьМ-тын пресс-сулууспата буолбакка, РФ ИДьМ-тын официальнай бэрэстэбиитэлэ, полиция полковнига Ирина Волк иһитиннэрдэ.
Ол курдук, бэҕэһээ сарсыарда 08.00 чаас саҕана Дьокуускай куорат полициятыгар Чайковскай уулуссатыгар турар биир дьиэ кыбартыыратыгар хаһыы-ыһыы, охсуһар-айдаарсар тыас иһиллэрин туһунан иһитиннэрии киирбит.
Ыйыллыбыт аадырыска тиийбит полицейскайдары подъезка кыбартыыра хаһаайката көрсүбүт. Бу 22 саастаах кыыс полицейскайдарга кэпсээбитинэн, кинини «гражданскай» кэргэнэ кырбаабыт.
Бу киһийдэх полиция үлэһиттэрэ дьиэҕэ киирэр түбэлтэлэригэр, 5 ыйдаах оҕону быһаҕынан анньан өлөрүөх буолан сааммыт.
Ааны аһар туһуттан экстреннэй сулууспалары ыҥырбыттар. Ол түмүгэр, полицейскайдар бу урут киһини кырбаан сууттана сылдьыбыт 21 саастаах уорбаланааччыны туппуттар, быһаҕын былдьаабыттар.
Кыысчааны ийэтин кытта балыыһаҕа киллэрбиттэр.
Тутуллубут киһиэхэ административнай боротокуол толоруллубут.
«Итиэннэ киниэхэ РФ Холуобунай кодексатын 119-с ыстатыйатынан, ол эбэтэр, өлөрөрүнэн суоһурҕаныы бэлиэтэ баарынан, холуобунай дьыала тэрийэр туһунан боппуруос көрүллэр», — диэн Ирина Волк иһитиннэрдэ.
Биһиги корр., «Саха сирэ» хаһыат, edersaas.ru
Хаартыска уонна видео: Дьокуускай куорат полициятын пресс-сулууспата.