Интэриниэт-форумнарга тахсар суруйууларынан сылыктаатахха, этиһэ-охсуһа, күннэтэ вулкан үрдүгэр курдук олорор дьоло суох ыаллар аҕыйаҕа суохтар быһыылаах. Биир оннук ыал полиция хараҕын далыгар киирбит.
Ол курдук, Дьокуускай куорат полициятын 3 №-дээх отделыгар балыыһаттан иһитиннэрии киирбит. Мунна тостубут дьахтар киллэриллибитин туһунан.
Участковай боломуочунай ити чахчыны бэрэбиэркэлээн быһаарбытынан, дьахтары 34 саастаах кэргэнэ буолуохсут кырбаабыт.
Ол күн кинилэргэ аймахтара сылдьыбыттар. Ыалдьыттара дьиэлэригэр бараары хомунан эрдэхтэринэ, кэргэнниилэр этиһэн-айдаарсан турбуттар, онтон устунан охсуһан киирэн барбыттар.
Ол түмүгэр, дьахтар мунна тостубут. Медиктэр бу эчэйиини доруобуйаҕа орто ыарахан эмсэҕэлээһин быһыытынан сыаналаабыттар.
РФ Холуобунай кодексатын 112-с ыст. 1 чааһынан холуобунай дьыала тэриллибит. Бу ыстатыйанан саамай үрдүкү накаастабыл миэрэ — 3 сылга диэри болдьоххо көҥүлү быһыы.
Бу туһунан СӨ ИДьМ-тын пресс-сулууспата иһитиннэрдэ.
Биһиги корр., «Саха сирэ» хаһыат, edersaas.ru
Хаартыска: интэриниэттэн.