Бүгүн сарсыарда ыарахан ыарыы кэнниттэн Өймөкөөн улууһун Бочуоттаах олохтооҕо, Ил Түмэн дьокутаата, олохтоох салайыныы боппуруостарыгар сис кэмитиэт салайааччыта Василий Александрович Местников олохтон барда.
edersaas.ru
Василий Местников парламеҥҥа 34 №-дээх Халыма-Индигиир биир мандааттаах быыбардыыр уокуругун салайбыта. Ил Түмэҥҥэ икки ыҥырыылаах мунньахха олохтоох салайыныы боппуруостарыгар сис кэмитиэт салайааччытын быһыытынан үлэлээбитэ. Үлэлээбит кэмин устата «Биир ньыгыл Арассыыйа» Бүтүн Араассыйатааҕы бэлитиичэскэй баартыйа ыытар үлэтин дьонугар-сэргэтигэр ылыннарыылаахтык тиэрдэрэ.
— Василий Местников 1958 сыллаахха бэс ыйын 10 күнүгэр Өймөкөөн улууһун Мойнообут нэһилиэгэр күн сирин көрбүтэ. Орто оскуоланы бүтэрэн баран, төрөөбүт Томторугар Өймөкөөн сопхуоска оробуочайынан үлэтин саҕалаабыта. 1982 сыллаахха Саха судаарыстыбаннай университетын бүтэрэн, үрдүк үөрэхтээх тутааччы идэтин баһылаабыта.
Дьалхааннаах 90-с сыллар саҥаларыттан төрөөбүт улууһун салайар үлэтэ саҕаламмыта. Ол курдук, Василий Александрович 1992-1993 сс. — улуус баһылыгын көмөлөһөөччүтүнэн, 1993-2000 сс. — баһылык бастакы солбуйааччытынан, 2000-2012 сс. — «Өймөкөөн улууһа» МТ баһылыгынан үлэлээбитэ. Кини төрөөбүт Өймөкөөнүн социальнай-экэмиичэскэй сайдыытыгар олоҕун 20 сылын анаабыта. Сэттэ сыл Өймөкөөн улууһуттан Ил Түмэн дьокутаатынан талыллан, олохтоох салайыныы боппуруостарыгар сис кэмитиэт салайааччытынан олоҕун тиһэх күннэригэр диэри үлэлээбитэ.
СӨ норуот хаһаайыстыбатын үтүөлээх үлэһитин, «Гражданскай килбиэн» бэлиэ хаһаайынын, тыа хаһаайыстыбатын туйгунун, Өймөкөөн улууһун Бочуоттаах киһитин Василий Александрович Местниковы биир дойдулаахтара «Өймөкөөн чаҕылхай уола» диэн ааттыыллара.
Василий Александрович Өймөкөөнүн сайдыытыгар, дьылҕатыгар ис сүрэҕиттэн кыһаллара. Улуус 100 сыллаах үбүлүөйүгэр туһуламмыт ыытыаллыахтаах былааннар, бырайыактар олоххо киириилэригэр утумнаахтык, бары сыратын биэрэн туран үлэлэспитэ. Тапталлаах Өймөкөөнүн улууһун олохтоохторо күндүтүк саныыр киһилэрин үтүө майгытын, тахсыылаах үлэтин өрүү өйдүү-саныы сылдьыахтара. Василий Александрович тапталлаах кэргэнигэр Валентина Николаевнаҕа, оҕолоругар, сиэнигэр дириҥ кутурҕаммын биллэрэбин, — диэн «Өймөкөөн улууһа» МТ баһылыга Иннокентий Сивцев кутурҕанын тиэрдэр.
Өрөспүүбүлүкэтээҕи таһымнаах улахан салайааччы Василий Местников Сахатын сирин, Өймөкөөнүн, Халыма Индигиир уокуругун улуустарын дьонун туһугар өрүү дууһатынан ыалдьара, кинилэр хас биирдии кыһалҕаларын бэйэтигэр олус чугастык ылынара. Кини оҕону кытта оҕо, кырдьаҕаһы кытта кырдьаҕас курдук өрүү биир тэҥник сыһыаннаһарын, үөрэ-көтө кэпсэтэрин Үөһээ Халыма, Муома, Орто-Халыма, Өймөкөөн улуустарын олохтоохторо махтана ахталлар. Дьоҥҥо убаастанар киһи хоту дойду уустук олоҕун бэйэтин-этинэн хаанынан билэн, көстөр ыарахаттары дьонун-сэргэтин кытта тэҥҥэ үллэстэн аһардыбыта. Ил Түмэҥҥэ кини үлэлиир кэбиниэтэ дьоҥҥо өрүү аһаҕас этэ. Хоту дойду дьоно бэйэлэрин киһилэригэр киирэр буолан, санааларын атастаһан, кыһалҕаларын быһаартаран, хайаан да өйөбүлү ылан, үөрэн-көтөн, бу кэбиниэттэн санаалара көнньүөрэн тахсаллара.
«Быдан дьылларга быраһаай, Василий Александрович, биһиги эйигин хаһан да умнуохпут суоҕа!» — дииллэр бу курус күн, убаастыыр киһилэрэ күн сириттэн барбытын истэн, өрүү саныыр-ахтар биир дойдулаахтара, Ил Түмэҥҥэ бииргэ үлэлээбит кэллиэгэлэрэ, оскуолатааҕы чугас доҕотторо, кинини кытта чугастык алтыспыт Саха сирин улуустарын олохтоохторо…
Елена ПОТОЦКАЯ, «Саха сирэ» хаһыат, edersaas.ru
Хаартыскаҕа Василий Кононов түһэриитэ.