Талааннаах ыччаты өйүүр регионнар икки ардыларынааҕы киин тэрийэн ыытар «Арассыыйа бастыҥ эдэр менеджерэ» күрэхтэһии түмүгэ билиннэ. edersaas.ru
Күрэхтэһии түмүгүнэн «Общественнай сектор менеджерэ» анал аат уонна «Арассыыйа бастыҥ эдэр менеджерэ» титул хаһаайыннарынан биир дойдулаахпыт Геннадий Охлопков ааттанна. Геннадий “Дьулуур” оҕо биир сомоҕо хамсааһынын бэрэссэдээтэлэ, “Арассыыйатааҕы үөрэнээччилэр хамсааһыннара” уопсастыбаннай судаарыстыбаннай тэрилтэ Саха сиринээҕи салаатын бэрэссэдээтэлэ буолар.
Бу улахан таһымнаах күрэхтэһии финалыгар Арассыыйа 11 субъегыттан 35-гэр диэри саастаах 22 эдэр дьон кытынна. Экспертэр кыттааччылар үс сылтан бэттэх ыыппыт үлэлэрин, бырайыактарын ырыттылар, дьүүллээтилэр. Кыайыылааҕы ахсынньыга дипломунан, «Арассыыйа бастыҥ эдэр менеджерэ» дастабырыанньанан, түөскэ иилиллэр бэлиэнэн уонна «Коммерческай (коммерческайа суох) тэриллии салайааччыта» стандартка эппиэттиир ирдэбиллэрдээх сертификатынан наҕараадалыахтара.
«Олус үөрдүм! Бииргэ үлэлиир дьоммунуун 2012 сылтан саҕалаан оҕо хамсааһыныгар, ыччат бэлиитикэтэ күүһүрэригэр систиэмэлээх уонна араас хабааннаах үлэни ыытабыт. Биһиги үлэбитин федеральнай таһымҥа элбэхтэ сыаналаабыттара. Маныаха СӨ Бырабыыталыстыбатын өҥөтө улахан», — диэн Геннадий Охлопков бэлиэтиир. edersaas.ru