Олунньу 14 — кулун тутар 6 күннэригэр Бүтүн Арассыыйатааҕы “Сыыппара уруога” үөрэх бырайыагын иитинэн быйыл “Сыыппара искусствота: муусука уонна ИТ” тиэмэлээх тэрээһиннэр буола тураллар.
“Сыыппара уруога” бырайыак Арассыыйаҕа 2018 сылтан ыытыллар. Тэрээһин иитинэн инники күөҥҥэ сылдьар ИТ хампаанньалар оскуолалар даҕаны, оҕолордоох төрөппүттэр даҕаны бэйэлэрэ үөрэтэллэригэр табыгастаах, сыыппара экэниэмикэтигэр сатабылларын үрдэтэллэригэр аналлаах уруоктары оҥороллор.
Былырыын “Сыыппара уруогун” иитинэн дойду үөрэнээччилэрин улахан аҥаардарын хаппыттар. Бырайыакка Арассыыйа 85 эрэгийиэнэ кыттыспыт. Бу үс аҥаар сыл устата саайты оҕо, төрөппүт уонна учуутал 45 мөл. тахсата киирэн көрбүт.
Быйылгы уруок “Сыыппара искусствота: муусука уонна ИТ” тиэмэтигэр аналлаах. Бу саҥа уруоктарга оҕолор технология көмөтүнэн муусука туһунан элбэҕи билэллэр уонна ону искусственнай интеллект көмөтүнэн айарга үөрэнэллэр.
“Сыыппара экэниэмикэтэ” автономнай кэммиэрческэйэ суох тэрилтэ РФ Үөрэҕириигэ министиэристибэтин, РФ цифровой сайдыыга, сибээскэ уонна маассабай коммуникацияларга министиэристибэтин өйөбүлүнэн инники күөҥҥэ сылдьар хампаанньалары кытта тэрийэллэр.
“ИТ уонна атын дьиссиппилиинэлэр кэмнэригэр саҥа технологиялар күннээҕи олохпут сорҕотунан буолаллар, олохпутун уларыталлар. Бу муусукаҕа эмиэ сыһыаннаах. Холобур, Яндекс.Муусука эрэкэмэндээссийэлэрэ истээччи туругуттан уонна настарыанньатыттан көрөн муусуканы (трек) сүүмэрдиир кыахтаах. Сервис алгоритма туһанааччыга сөбүлүүр уонна билбэт муусукатын сөптөөхтүк талаары тыһыынчаттан тахса чахчыны (факт) учуоттуур. Сыыппара саҥа уруогар биһиги муусукаҕа уонна ИТ эйгэтигэр туох буола турарын кэпсиибит: муусуканы билэргэ уонна сыыппараҕа киллэрэргэ ханнык технология ирдэнэрин, искусственнай интеллект киһини кытта ханнык муусуканы оҥоруон сөбүн”, — диэн Арассыыйаҕа Яндекс генеральнай дириэктэрэ Елена Бунина санаатын үллэстэр.
“Искусственнай интеллект араас үнүстүрүмүөннэргэ билигин матыыбы, ритмы уонна тембры, ону тэҥэ, ырыаһыттар истииллэрин уонна куоластарын оҥорор кыахтаах”, — диэн РФ Цифровой сайдыыга, сибээскэ уонна маассабай коммуникацияларга министиэристибэтин бырагыраамаларын уонна бырайыактарын сүрүннүүр департамент дириэктэрэ Татьяна Трубинина бэлиэтиир.
Матырыйааллар 1-11 кылаас оҕолоругар кээмэйинэн уонна уустугунан көрөн сөп түбэһэллэр. Билиилэрин хаҥатар инниттэн уруоктарга видеолары, теориялаах комикстары, инфографиканы уонна интерактивнай тренажердары туһаналлар. Бары матырыйааллар урокицифры.рф саайтка баар буолуохтара диэн этэллэр.
“Саха сирэ” хаһыат, edersaas.ru
Хаартыска: primorsky.ru