2024 сылга Саха сиригэр биллэриллибит Оҕо саас сылыгар Ил Дархан Айсен Николаев оҕолорго анаан тугу көҕүлээтэ? Кини Анал этиитигэр: «Хас биирдии оҕо дьоҕурун, талаанын арыйан, сайдар-үүнэр бырааптаах», — диэн этэн турар.
— Бүтүн Арассыыйатааҕы оскуола олимпиадаларыгар кыайбыт уонна бириистээх миэстэлрэи ылбыт үөрэнээччилэр 100-тэн 500 тыһыынча солкуобайга диэри суумалаах бириистэринэн наҕараадаланыахтара.
— Элбэх оҕолоох дьиэ кэргэттэр үрдүкү кылаастарга үөрэнэр оҕолоро орто анал үөрэх кыһатыгар үөрэнэллэригэр 50 тыһыынча солкуобай бэриллиэҕэ.
— 2024 сыл от ыйын 1 күнүттэн улаатан эрэр оҕолорго аналлаах «Мин бастакы хамнаһым» диэн бырагыраама үлэлиэҕэ. Бу бырагыраама социальнай хантараакка маарынныаҕа.
Култуура, спорт өттүгэр эмиэ уларыйыылар бааллар.
— 7-13 саастаах үөрэнээччилэр «Карта юного жителя Якутии» каартаны ылыахтара. Бу каара «Пушкинскай каарта» курдук үлэлиир, 5 тыһыынча солкуобай киирэ сылдьар. Бу каартанан мусуойдарга, тыйаатырдарга, спортивнай секцияларга төлөһүөхтэрин сөп.
— Аны сайын «Азия оҕолоро» VIII спортивнай оонньуулар оҕолорго, ыччаттарга улахан суолталаах буолуоҕа.
— 2024 сылга «Хотугу сулус» оҕо киинэ, өрөспүүбүлүкэ үөрэнээччилэрин билилэрин хаҥатарга аналлаах дистанционнай технологиялаах үөрэтэр киин, Мииринэйгэ Оҕо дыбарыаһа аһыллыахтара.
— 2024 сылга оҕолорго анаан Саха сирин устун айанныыр экскурсионнай, туристическай маршруттар үлэлиэхтэрэ.
— «Саха» тэлэбиидэнньэтигэр оҕо ханаала аһыллыаҕа.