СИА иһитиннэрэринэн, дойду бэрэсидьиэнэ Владимир Путин Федеральнай Мунньахха туһаайан эппит этиилэрин ааспыт нэдиэлэҕэ өрөспүүбүлүкэтээҕи Медиакииҥҥэ дьокутааттар, улуус баһылыктара, профсоюзнай хамсааһын салайааччылара мустан, Сахабыт сиригэр ити хайдах дьайыан сөбүн дьүүллэстилэр.
edersaas.ru
Үгүстэр көрө-истэ сылдьаргыт курдук, бэрэсидьиэн Анал этиитигэр оҕолоох дьиэ кэргэни өйөөһүҥҥэ, кинилэргэ анаан ипотека бырыһыанын түһэрэргэ, урбааны сайыннарарга, доруобуйа харыстабылын уонна үөрэҕирии таһымын үрдэтэргэ, үп-харчы өртүнэн кыаммат ыал олоҕун тупсарарга үлэ барыахтаах, диэн этиллэр
Төһө даҕаны Ийэ хапытаалынан мончууктаабыттарын иһин, өрөспүүбүлүкэҕэ оҕо төрөөһүнэ аҕыйыы турар диэн этэр РФ Общественнай балаататын чилиэнэ Вячеслав Алексеев. Онон бу хайысханан бэрэсидьиэн тус этиитинэн, оҕолоох ыалларга чэпчэтиилээх ипотека, оҕо босуобуйатын тиийинэн олоруу икки алын кээмэйигэр диэри үрдэтии, элбэх оҕолоохторго дьиэ-уот нолуогар кэккэ чэпчэтии көрүллүөхтээх.
«Якутпромстрой» хампаанньа дириэктэрин солбуйааччы Лариса Панькова: «Нэһилиэнньэни түргэнник атыыга барар чэпчэки сыаналаах уонна хаачыстыбалаах кыбартыыранан хааччыйарга тутуу эйгэтин урбаанньыттара тус интэриэстээхтэр. Ону олоххо киллэрэр туһугар тутууга нолуок кыччыан, үлэлииргэ усулуобуйа тэриллиэн наада», — диэн эттэ кини.
«Биир ньыгыл Арассыыйа Эдэр гвардиятын» Саха сиринээҕи салаатын бэрэссэдээтэлэ Василий Попов этэринэн, оҕо харчыта үрдээтэҕинэ, өрөспүүбүлүкэҕэ бастакы зонаҕа – 34022 солкуобай, иккис зонаҕа – 27152 солкуобайга тэҥнэһиэҕэ. Онон куоракка уонна тыа сиригэр оҕо төрөөһүнүгэр тоҕоостоох түгэн тосхойуо.
Оччотугар оҕо саадыгар уонна оскуолаларга эбии миэстэ тахсыан, саҥа тутуу барыан наада. Ону таһынан, «төгүрүк остуол» кыттыылаахтара тыа оскуолаларын түргэн интэриниэтинэн хааччыйыы, ГСМ сыанатын түһэрии, бөҕү хомуйар, ону харайар уонна суох оҥорор собуот тутуутун о.д.а. боппуруостары ырытыстылар.
Аны биир сылынан олоххо туох саҥа ыйаах киирбитэ биллэн, дьон олоҕо төһө тупсубутунан ол сыаналаныа.
Марианна Тыртыкова, «Саха сирэ», edersaas.ru