Офтальмологтар улуустарга эпэрээссийэ оҥоро тиийдилэр

Бөлөххө киир:

Саха сирин Ил Дархана Айсен Николаев сорудаҕынан офтальмология өрөспүүбүлүкэтээҕи килиниичэскэй балыыһата  өрөспүүбүлүкэ улуустарыгар көһө сылдьан хирургия өҥөтүн оҥорор.

Бүгүн, бэс ыйын 6 күнүгэр,  офтальмологтар биригээдэлэрэ Томпо уонна Таатта оройуоннарыгар барда. Таатта улууһун оройуоннааҕы киин балыыһатыгар  Чурапчы улууһун олохтоохторо эмиэ кэлэн эпэрээссийэлэниэхтэрэ.

Балыыһа кылаабынай бырааһа Иван Луцкан иһитиннэрбитинэн, бэс ыйын 6-17 күннэригэр хирурдар үс улуустан сүүстэн тахса  киһини эпэрээссийэлиэхтэрэ.

«Бу улуустар олохтоохторо Дьокуускайга кэлбэккэ эрэ тустаах көмөнү ылыахтара. Түөрт исписэлиистээх  биригээдэҕэ офтальмолог-хирурдар  Марина Максимова, Иннокентий Белолюбскай уонна эпэрээссийэ мэдиссиинискэй сиэстэрэлэрэ Лена Ермолаева, Екатерина Стручкова үлэлииллэр.

Кылаабынай быраас этэринэн, сүрүннээн катаракта эпэрээссийэлэрэ оҥоһуллуохтара.  Быраастар миэстэтигэр  олохтоохтор доруобуйаларын эбии чинчийэн, түмүк таһаарыахтара.

Көһө сылдьар биригээдэ маны таһынан эпэрээссийэлэри оҥорорго туоннанан мэдиссиинискэй тэриллэри аҕалла.

«Сарсын хирурдар Хаандыгаҕа тиийэн эрдэ суруйтарбыт дьоҥҥо эпэрээссийэлэри оҥоруохтара. Ол кэнниттэн Таатта улууһун киинигэр тиийэн бастаан Ытык Күөл, онтон Чурапчы улууһун дьонугар мэдиссиинискэй көмөнү оҥоруохтара. Иван Луцкан быһаарбытынан, Чурапчытааҕы киин балыыһа офтальмология биригээдэтин ыҥыран үлэлэтэргэ билиҥҥитэ тустаах көҥүлү  ыла илигинэн, Таатта улууһугар кэлэн харахтарын эпэрээссийэлэтэллэр.

Эрдэ иһитиннэрбиппит курдук, көһө сылдьар биригээдэ от ыйын бүтүүтэ Эдьигээн улууһугар тиийиэҕэ.  Маннык быһаарыы Ил Дархан  Айсен Николаев быһа эпииргэ тахсыбыт кэмигэр бу улууска харах бырааһа суоҕун туһунан иһитиннэрии киирбитин  кэнниттэн ылыллыбыта.

Иван Луцкан Ил Дархан сорудаҕа толорулларын туһунан тоһоҕолоон бэлиэтээтэ. Ону таһынан атырдьах-балаҕан ыйдарыгар офтальмология өрөспүүбүлүкэтээҕи килиниичэскэй балыыһатыгар  көһө сылдьар мэдиссиинискэй комплекс  аҕалыллыаҕа. Дьэ, бу маннык көдьүүстээх тэрили илдьэ быраастар  өрөспүүбүлүкэ улуустарыгар тиийиэхтэрэ уонна эпэрээссийэҕэ бэлэмнэниэхтэрэ. Бу, биллэн турар, мэдиссиинискэй көмө хаачыстыбатыгар уонна табыгастаах буоларыгар көмөлөөх буолуоҕа.

Надежда ЕГОРОВА, “Саха сирэ”, edersaas.ru

+1
0
+1
0
+1
0
+1
0
+1
0
+1
0
+1
0