Офтальмология балыыһата хотугу улуустарга болҕомтото уҕараабат

Бөлөххө киир:

Кулун тутар 1-16 күннэригэр офтальмология өрөспүүбүлүкэтээҕи киин балыыһатын клинико-диагностическай отделениетын офтальмолог-бырааһа Анна Васильева Аллараа Халыма улууһугар үлэлээтэ.

«Барыта 475 киһи кэлэн хараҕын туругун бэрэбиэркэлэттэ. Андрюшкино, Походскай, Колымскай, Черскэй бөһүөлэктэргэ тиийэ сырыттыбыт. Ону таһынан Аллараа Халыма оройуоннааҕы киин балыыһатын базатыгар үлэлээтим. Сарсыарда эрдэттэн киэһэ хойукка диэри, өрөбүл күннэргэ эмиэ дьон кэлэ турда. Офтальмологка харах туругун кэмигэр көрдөрүү харах араас ыарыытыттан сэрэтэр. Диагностика кэмигэр, хойутаабакка оҥоһулуннаҕына эмтэнии көдьүүстээх буоларын бары билэбит», -– диэн Анна Васильева билиһиннэрдэ.

Онтон кини сорох ыраах сытар нэһилиэктэргэ 10-нуу чааска тиийэ кэм устата айанныы сырытта.

Офтальмология өрөспүүбүлүкэтээҕи килиниичэскэй балыыһатын көһө сылдьар биригээдэлэрин ыҥыран нэһилиэнньэтин көрдөрүөн баҕалаах улуус ахсаана элбиир.


Бу күннэргэ офтальмология өрөспүүбүлүкэтээҕи килииничэскэй балыыһатыгар өрөспүүбүлүкэ долганнарын ассоциациятын бэрэссэдээтэлэ Ольга Тимофеева-Терешкина кэлэ сырытта. Ольга Федоровна балыыһа кылаабынай бырааһа Иван Луцканы кытары көрсөн кэпсэтэн, офтальмология көмөтүн оҥоруу хоту сытар улуустарга,  чуолаан долганнар түөлбэлээн олорор Анаабыр улууһун Үрүҥ Хайа сэлиэнньэтигэр,  табыллыаҕын итэҕэйдэ.
«Бу көрсүһүү кэнниттэн офтальмология балыыһатын биригээдэтэ Анаабыр оройуоннааҕы киин балыыһатыгар баран үлэлиирин тэрийии боппуруостарын дьүүллэһиэхпит. Онтон чугастааҕы кэмҥэ офтальмолог-бырааска мэдиссиинискэй көмөҕө наадыйар Анаабыр улууһун дьоно Өлөөн улууһугар кэлэллэрин курдук тэрийэ сатыахпыт. Өлөөн улууһугар офтальмология өрөспүүбүлэкэтээҕи балыыһатын көһө сылдьар биригээдэтэ муус устар 14-20 күннэригэр кэлэн үлэлиэхтээх», -– диэн Ольга Тимофеева-Терешкина 1992 сылтан тэриллибит долганнар ассоциацияларын үлэлэриттэн биир сүрүннэрин билиһиннэрдэ.

Надежда ЕГОРОВА, «Саха сирэ», edersaas.ru

+1
0
+1
0
+1
0
+1
0
+1
0
+1
0
+1
0