Бэҕэһээ, алтынньы 19 күнүгэр, бу өрөбүлгэ Саха сиригэр бэлиэтэнэр Ийэ күнүн чэрчитинэн Горнай улууһун Одуну нэһилиэгэр бэлиэ дьоро күн буолла.
edersaas.ru
Саҥа күн сирин көрбүт кырачааннар олохторун устата илдьэ сылдьар ааттарынан сүрэхтэниилэрэ буолла. Бу күн Одуну нэһилиэгин күндүттэн күндү саҥа олохтоохтоохторун төрөппүттэригэр оҕолор бастакы докумуоннарын туттарыы сиэрэ-туома ыытылынна. Биэс дьиэ кэргэн аан бастаан Ийэ уонна Аҕа аатын сүктүлэр. Үс дьиэ кэргэҥҥэ үһүс оҕолоро күн сирин көрөн, элбэх оҕолоох ыал статуһун ыллылар.
Бу ыраас сырдык күн ким үөрбэт-көппөт буолуоҕай! «Ийэҕэ Махтал» ытык бэлиэ хаһаайката К. П. Данилова саҥа биир дойдулаахтарыгар кэс тылын анаата. Эдэр ыалларга элбэх эҕэрдэ тыла этилиннэ, алгыс баһа сыаланна.
Одунуга Саҥа киһи кэллэ,
Маҕараспар ОҔО төрөөтө!
Айыыһыкка махтаныаҕыҥ,
Аал уоппутун тигинэччи оттуоҕуҥ!
Мария НОГОВИЦЫНА,
Горнай улууһа.
Хаартыскаҕа ааптар түһэриитэ.