Горнай улууһун Одуну нэһилиэгин кыраайы үөрэтэр «Албан аат түмэлэ» сөргүтүллэн, үөрүүлээх быһыыга- майгыга нэһилиэгин дьонугар, ыалдьыттарга аанын арыйда.
Нэһилиэк баһылыгын солбуйааччы Роман Ноговицын олохтоох кыраайы үөрэтээччилэри кытта 2019 сыллаахха Бэрэсидьиэн пуондун Граныгар бырайыакка кыттан, 448.297 солк. уонна Горнай улууһун 50.000 солк. сууммалаах граннарын кыайан, бу музей сөргүтүлүннэ. Онон нэһилиэккэ биир сүҥкэн суолталаах бырайыак олоххо киирдэ.
Аан бастаан нэһилиэккэ музейы тэрийбит киһинэн историк учуутал, энтузиаст, РСФСР үөрэҕириитин туйгуна, Горнай улууһун бочуоттаах олохтооҕо Гаврил Данилович Яковлев этэ. Кини бастакы выпускниктара, музей тэриллэригэр оччолорго оҕолор — Корякина Прасковья Матвеевна, Поротова Дария Егоровна күн бүгүҥҥэ диэри бэриниилээхтик, ис сүрэхтэриттэн ылсан үлэлии сылдьаллар. Улуус уонна нэһилиэк аатыттан музей сөргүтүүтүгэр сүҥкэн кылааттарын иһин Прасковья Матвеевнаҕа
«Духовный попечитель Горного улуса», «За вклад в развитие Одунунского наслега» үрдүк наҕараадалар, Поротова Дария Егоровнаҕа улуус «Бочуотунай грамотата», нэһилиэк «Бочуоттаах гражданина» наҕараадалар ытыс тыаһынан доҕуһуолланан туттарылыннылар. Маны тэҥэ, Горнай улууһун социальнай политикатын отделын аатыттан бырайыак ааптарыгар, олоххо киллэрбит Роман Ноговицыҥҥа махтал сурук туттарылынна.
Бырайыак хамаандатын хамыыһыҋатыгар киирэн үлэлээбит, Маҕарас орто оскуолатын география уонна биология учууталыгар Жиркова В.И., педагог-бибилэтиэкэр Степанова М.Р., Гаврил Данилович кыыһыгар, алын сүһүөх кылаас учууталыгар Попова Е.Г. улуус уонна нэһилиэк аатыттан махтал суруктар тутарылыннылар.
Горнай улууһун баһылыгын бастакы солбуйааччы Сардаана Стручкова истиҥник эҕэрдэлээн туран, музей дьиэтигэр компьютер бэлэх уунна.
Музей оҕо саадын эргэ дьиэтигэр аҕыс хоһу ылан, экспонаттара тус-туспа хайысхаларынан наардаммыттар. Нэһилиэк олохтооҕо Афанасий Макаров музей ис-тас өттүн сүрдээх тупсаҕай гына оҥорбута сүргэни көтөҕөр.
Маны сэргэ, саамай улахан үлэ барбыт түмүгэ — Каталог экспонатов Одунунского наслежного краеведческого «Музея славы» диэн ааттаах каталог бэчээттэнэн тахсыбыта буолла. Манна нэһилиэкпит сэдэх маллара, раритеттара таҥыллан, хаартыскаланан, инвентарнай ньүөмэрдэнэн киирдилэр.
Одуну нэһилиэгэр арыллыбыт музей дьиэбит кэлэр кэнчээри ыччакка, дьонугар-сэргэтигэр история кэрэһитэ, чахчыта, өбүгэлэрбит утумнара буолан ыллыга сырдыырыгар, ыыра кэҥииригэр баҕарабыт, эрэнэбит.
Мария Степанова