“Одун” ансаамбыл салайааччыта Туяра Колодезникова полуфиналга таҕыста

Бөлөххө киир:

Дьокуускай оҕо киинин педагога, оҕо этнокултуурунай киинин уонна “Одун” норуодунай ансаамбылын салайааччыта Туяра Колодезникова оҕолору уонна ыччаты кытта үлэлиир исписэлиистэр идэлэрин үрдэтэр Бүтүн Арассыыйатааҕы куонкуруска полуфиналга таҕыста. Бу куонкуруһу Оҕо уонна ыччат дьыалаларыгар регионнар икки ардыларынааҕы методическай киин федеральнай агентство өйөбүлүнэн ыытар уонна 2019 сылга Global Teacher Prise бириэмийэҕэ Арассыыйаттан сүүмэрдиир. Сүүмэрдиир түһүмэх ахсынньы 23 күнүттэн 2019 сыл тохсунньу 23 күнүгэр диэри ыытыллыбыта. Манна Арассыыйа бары регионнарыттан 200 киһи кыттыбыта.

Куонкурус полуфиналыгар киирбит Туяра Колодезникова Бүтүн Арассыыйатааҕы куонкурус призерунан буолла. Куонкурус финала быйыл кулун тутар 22-23 күннэригэр Красноярскай куоракка ыытыллыаҕа. Кыайыылаахтар кыһыл көмүс, үрүҥ көмүс, боруонса мэтээллэргэ тиксиэхтэрэ. Ону сэргэ Гран-при хаһаайына Global Teacher Prise финалыгар Холбоһуктаах Арабскай Эмираттарга кытта барыаҕа. Global Teacher Prise аан дойдутааҕы бириэмийэ тэрийээччитинэн Varkey Foundation норуоттар икки ардыларынааҕы фонда буолар. Global Teacher Prise сыллата бэриллэр бириэмийэ биир мөлүйүөн дуоллар кээмэйдээх уонна аан дойду чулуу учууталыгар бэриллэр.

Туяра Колодезникова – Саха Өрөспүүбүлүкэтин Бэрэсидьиэнин стипендиятын лауреата. Маны кини үгүс Арассыыйатааҕы, норуоттар икки ардыларынааҕы куонкурустарга кыттан уонна Саха сирин норуоттарын култууратын тарҕатыы иһин ылбыта. Кини үгүс таһымнаах грамоталардаах. 2010 с. учууталлар өрөспүүбүлүкэтээҕи куонкурустарын “Кыталык Куо” титулун ылбыта. 2013 с. “Учуутал сиэр-майгы өттүнэн кыайыыта” педагогика, оҕолору кытта үлэ Бүтүн Арассыыйатааҕы куонкуруһугар “Сыл бастыҥ педагогическай чинчийиитэ” номинацияны ылбыта. 2015 с. “Үөрэхтээһини салайыы” бырайыак Бүтүн Арассыыйатааҕы куонкурус дипломунан наҕараадаламмыта. 2016 с. “Саха Өрөспүүбүлүкэтин бастыҥ педагогическай үлэһитэ” номинацияҕа Саха Өрөспүүбүлүкэтин Ил Дарханын бириэмийэтин туппута. 2017 с. “Арассыыйа үөрэхтээһинин кыһыл көмүс фондата” национальнай бириэмийэ үрүҥ көмүс мэтээлин анньыммыта. Былырыын ыччат Бүтүн Арассыыйатааҕы бырайыагар кыттан, 1 мөл суумалаах граҥҥа тиксибитэ. Ити курдук, кини кыайыыларын ааҕан сиппэккин.

Бүгүн кини салайар “Одун” оҕо этнокултуурунай киинигэр Дьокуускай куорат бары уокуруктарыттан 500 –чэ оҕо дьарыктанар.

“Одун” норуодунай ансаамбыл уонна “Кэнчээри” дьиэ кэргэн кулууптарын кэлэктиибэ.

+1
0
+1
0
+1
0
+1
0
+1
0
+1
0
+1
0