Одьулууннааҕы Аграрнай техникум тыа сирин саҥа хаһаайыннарын бэлэмниир

 Быйыл үйэ аҥардаах үбүлүөйүн бэлиэтиир биһиги үөрэхпит кыһата 50 сыл устата тыа сиригэр аналлаах үрдүк таһымнаах оробуочай каадырдары иитиигэ-үөрэтиигэ дьулуурдаахтык үлэлэһэр.

edersaas.ru

Кылгастык историятыттан

Ол курдук, 1967 сыллаахха Чурапчы улууһун Дьабыыла нэһилиэгэр Мэҥэ-Хаҥалас улууһун Төҥүлү 4№-дээх профессиональнай техническэй училище филиалын быһыытынан, оччотооҕу В.И. Ленин аатынан холкуос бэрэссэдээтэлэ, “Бочуот знага” уордьан кавалера, Саха АССР Үрдүкү Сэбиэтин дьокутаата Е.С. Николаев көҕүлээһининэн аһыллан, үлэтин саҕалаабыта.

1969 сыллаахха филиал кэҥээн, туспа 13 №-дээх профтехучилище буолбута. Идэҕэ үөрэтиини сэргэ, 1974 сыллаахтан ыччаты орто уопсай үөрэхтээһиҥҥэ ылбыта.

1997 сыллаахха өрөспүүбүлүкэ алмааһы хостуур, байытар бырамыысаланнаһын салгыы сайыннарыыны сэргэ олоххо-дьаһахха туттуллар араас тэриллэри, ювелирнай киэргэллэри оҥорон таһаарарга олохтоох ыччаты бэлэмниир сыалтан, СӨ маҥнайгы бэрэсидьиэнэ Михаил Николаев 635-дээх дьаһалыгар олоҕуран, училище Одьулууннааҕы политехническэй лицей аатын ылбыта. 2000 сыллаахха, уопсай орто үөрэҕи профессиональнай үөрэҕи кытта ситимниир экспериментальнай былассаакка быһыытынан, Одьулууннааҕы оскуола-лицейгэ кубулуйбута.

2004 сыллаахха, СӨ Бырабыыталыстыбатын ыйааҕынан, “14 №-дээх профессиональнай лицей”  аат иҥэриллэр.

2010 сыллаахха Одьулууннааҕы лицей Бүтүн Арассыыйа үрдүнэн “Сто лучших образовательных учреждений СПО, НПО России” куонкурус лауреатынан буолбута.

2014 сылтан “Аграрнай техникум” диэн орто анал үөрэх тэрилтэтин быһыытынан үлэлиир.

Кыһыл көмүс мэтээллээх үөрэх кыһата

2016 сыллаахха Бүтүн Арассыыйатааҕы “Сто лучших ССУЗов России” куонкурус лауреата буолан иккис кыһыл көмүс мэтээлинэн наҕараадаланар.

Училище атаҕар турарыгар, салгыы сайдарыгар бэйэлэрин кыахтарын туһанан, кыһаллан-мүһэллэн араас сылларга дириэктэрдэринэн үлэлээн кэлбиттэрэ:  С.Д. Попов  (1967-1969), Д.Д. Трофимов (1969-1970), С.Н. Плотников (1970-1976), А.С. Шишигин (1976-1982), М.М. Максимов (1982-1991), М.Г. Никифоров (1991-1995), И.С. Артемьев (1995-1996), М.Г. Сибиряков (1996-1999), Г.И. Адамов (1999-2004)¸ Е.И. Спиридонова (2004-2013), А.А. Попов (2013- 2016), оттон 2017 сылтан дириэктэринэн М.В. Макаров таһаарыылаахтык үлэлии-хамныы сылдьар.

Өрүү үтүө тылынан ахтан-санаан ааһабыт өр сылларга үтүө суобастаахтык үлэлээн ааспыт коллегаларбытын: РФ ПТҮө үтүөлээх үлэһиттэрэ Аграфена Васильевна Ноева, Петр Петрович Сергеев, Михаил Михайлович Максимов, СӨ үтүөлээх учууталларын Михаил Степанович Ноговицыны, Михаил Михайлович Бекяновы, СӨ култууратын үтүөлээх үлэһитин, педагогическай үлэ бэтэрээнин Михаил Прокопьевич Ефимовы, РФ ПТҮө туйгуннарын Галина Максимовна Дьячковскаяны, Екатерина Петровна Гуляеваны, Анна Афанасьевна Никифорованы, Ольга Ивановна Митинаны уо.д.а.

Киэн тутта ааттыыбыт

50 сыл устата биһиги үөрэхпит кыһатыттан 10.000 кэриҥэ идэлээх дьон кынат анньынан, олох киэҥ аартыгар тахсыбыттара, кинилэртэн киэн тутта ааттыыбыт:

Валерий Дмитриевич Барашковы – “Үлэ албан аата” уордьан кавалерын, улуус, өрөспүүбүлүкэ хас да төгүллээх чөмпүйүөнүн, рекордсмен-суоппары;

Дмитрий Михайлович Ноевы – СӨ тыатын хаһаайыстыбатын туйгунун, СӨ судаарыстыбаннай бириэмийэтин лауреатын;

Нина Николаевна Чигиреваны – СӨ уонна РФ үтүөлээх артыыһын;

Раиса Яковлевна Захарованы – СӨ үтүөлээх артыыһын;

о. д. а.

Аныгы кэм идэлэригэр үөрэтэбит

Быйылгы үбүлүөйдээх үөрэх сылыгар эдэр кэскиллээх салайааччылаах Аграрнай техникум аныгы кэм ирдэбиллэригэр  эппиэттиир, идэтин толору баһылаабыт, тыа сирин саҥа хаһаайыннарын бэлэмниир сыаллаах- соруктаах үлэлиир. Ол курдук, манна тоҕус үөрэх бөлөҕө аһылынна: “Автомеханик”, “Тыа хаһаайыстыбатын тракторист-машиниһа”, “Сир уонна хамсаабат баай сыһыаннаһыыларын исписэлииһэ”, “Тыа хаһаайыстыбатын бородууксуйаларын оҥорон таһаарыы технолога”, “Үүт-аһы оҥоруу  маастара”, о.д.а.

Маны таһынан, иккис куурус “Сир уонна хамнаабат баай сыһыаннаһыыларын исписэлииһэ”, “Сварщик” бөлөхтөр аһылыннылар. Барыта холбоон, 23 араас улуустан 225 устудьуон кэлэн, үөрэнэ сылдьар. Кинилэр истэригэр 12 хотугу аҕыйах ахсааннаах норуоттар ыччаттара бааллар. Устудьуоннар ортолоругар 10 тулаайах, 80 кыаммат дьиэ кэргэнтэн уонна үс доруобуйаларынан хааччахтаах оҕолор үөрэнэллэр. Кинилэр үөрэхтэрин таһынан дьарыктаах буолууларын уонна тус дьоҕурдарын сайыннарар  сыаллаах успуорт, ырыа-үҥкүү, литэрэтииринэй ааҕыы уонна хаартыскаҕа түһэрии куруһуоктара үлэлииллэр.

         Техникумҥа 18 үрдүк, 10 орто анал үөрэхтээх, 9 туйгун, 3 үрдүк, 16 базовай категориялаах, барыта 28 педагог үлэлиир. Техникум сайдыытыгар бииргэ үлэлэһэргэ “Сахатранснефтегаз” акционернай уопсастыбаны, Чурапчы улууһун ТХПК–тын, Чурапчытааҕы олох-дьаһах хомунаалынай хаһаайыстыбаны, Дьокуускайдааҕы уонна Новосибирскайдааҕы тыа хаһаайыстыбаларын академияларын кытта дуогабар түһэрилиннэ.

Бастыҥнар

Өрөспүүбүлүкэҕэ иккис төгүлүн ыытыллар “Сыл бастыҥ куратора” куонкуруска оҥорон таһаарыы үөрэхтээһинин маастара Анна Николаевна Дьячковская 1 миэстэни ылбыта. Техникуммут IV Санкт-Петербурдааҕы норуоттар икки ардыларынааҕы форумҥа, Арассыыйа тутулуга суох уопсастыбаннай Сэбиэтин дириэктэрдэрин сойууһун күрэхтэһиитигэр кыайан-хотон,  «Арассыыйа 100 бастыҥ орто анал үөрэҕин тэрилтэтэ»  үрдүк аат лауреата буолбута.

Сылын ахсын ыытыллар “Эдэр профессионаллар” күрэхтэһиилэригэр А.А. Седалищев салайааччылаах ”Автомеханик” бөлөх устудьуона Геяна Родионова III миэстэни ылары ситистэ.

Оҥорон таһаарыы үөрэхтээһин маастара А.А. Гуляев, Хаандыгатааҕы “Горно-геологическай техникумҥа” ыытыллыбыт “Актуальные вопросы подготовки кадров в условиях модернизации системы профессионального образования РС(Я)” конференцияҕа 1-кы миэстэни ылла.

Илин эҥэр улуустар икки ардыларыгар ыытыллыбыт «Сварщик -2018» күрэххэ С.К. Карпов салайааччылаах “Сварщик ” бөлөх устудьуоннарын хамаандата III миэстэ буолла.

Үгэскэ кубулуйбут өрөспүүбүлүкэтээҕи «Инникигэ хардыы» ааҕыыларыгар Петя Пестряков «Сварщик» бөлөх устудьуона лауреат буолан, Казань куоракка кыттар чиэскэ тигистэ уонна «Акыйаан» лааҕырга сынньанан кэллэ.

Техникум иитэр–үөрэтэр үлэтэ кэнники сылларга биллэ тубуста.  Ол курдук, улуус, нэһилиэк иһинэн ыытыллыбыт дьаһалларга устудьуоннар уонна үлэһиттэр көхтөөхтүк кытталлар. Чурапчы улууһугар ыытыллыбыт  «Куолас» ырыа күрэҕэр Анастасия Колесова 2-с миэстэ буолла. Арсиэн Эверстов «Сварщик» бөлөх устудьуона улуустааҕы «Чурапчы — айхаллан» бэстибээл лауреатынан буолла.

Кэскиллээх былааммыт

Техникум устудьуоннара Сардаана Янкова – «ЗИО-16» группа устудьуона гиирэни анньыыга өрөспүүбүлүкэ аһаҕас турнирыгар муҥутуур кыайыылаҕынан буолла. Мас тардыһыытыгар, Чурапчы улууһун тыа сирин спордун маастардарын бирииһигэр, “Манчаары” Оонньууларыгар бэлэмнэнии бэстэбээлигэр «ПКК» группа устудьуона Влада Барашкова 2-с миэстэни ылла. «ТРМ-16» группа устудьуона Петр Захаров өрөспүүбүлүкэҕэ хапсаҕайдаһан тустууга хас да төгүллээх чөмпүйүөн, “Манчаары” 20-с оонньууларын призера.

Кэлэр үөрэх сылыгар техникум кэҥиир-сайдар кэскиллээх:  «Повар- кондитер» уонна «Бэтэринээринэй дьыала» диэн саҥа идэлэри, уопсайа 10 бөлөҕү аһан үлэлэтии былааҥҥа киирдэ.

Ити курдук, биһиги Одьулуун нэһилиэгин, Чурапчы улууһун, Саха өрөспүүбүлүкэтин сайдыытыгар кылааппытын киллэрсэ олорорбутунан киэн туттабыт.

Одьулууннааҕы Аграрнай техникум 50 сылыгар аналлаах үбүлүөйдээх тэрээһин бырагыраамата

 

                                        Муус устар 7 күнэ. 2018 с.

 

   Чурапчы улууһа, Одьулуун с. Аграрнай техникум

09.00 -11.00   Регистрациялааһын, экскурсия 

Киирэр ааҥҥа фойе

10.00  «Сиэр-туом»

 

11.00-13.00 Үөрүүлээхтик аһыы

• Бырааһынньыктааҕы эҕэрдэлэр
• наҕараадалааһыннар

Аактабай саала

 

13.00-14.00  Эбиэт

Остолобуой, 2-с этээс, Блок В, № 1, 2, 3, 4. кабинеттар

 

14.00-15.00 Выпускниктар галереяларын аһыы

• эҕэрдэ
• наҕараадалааһыннар

1-кы этээс,  блок В

 

14.00-15.00 Кинигэ сүрэхтэниитэ

• эҕэрдэ
• наҕараадалааһыннар

Педагогическай мусуой

 

15.00 Выпускниктар параадтара

• тыл этиилэр, эҕэрдэлэр

Буолар сирэ: Аактабай саала

 

17.00  Ыҥырыылаах ыалдьыттарга уонна техникум үлэһиттэригэр банкет

• наҕараадалааһын

Спортивнай саала

 

19.00  Кэлэктиип уонна устудьуоннар уус-уран самодеятельностарын кэнсиэрэ

          Аграрнай  техникум

• наҕараадалааһын

 «Сайдыс» КСК

Техникум  педагогическай кэлэктиибэ, Чурапчы улууһа.