Чурапчы улууһун бырайыага 2021-2022 сылларга «Тыа сирин кэлимник сайыннарыы» судаарыстыбаннай бырагырааматыгар киирбитэ.
Ол курдук, Одьулууҥҥа уу ситимин тутуу, олорор дьиэлэргэ гаас ситимин тардыы итиэннэ «Сайдыс» МБУ ГАЗ массыынаны атыылаһыы бырайыактара олоххо киириэхтээх.
«Үс бырайыагы үлэлэтэргэ 40 мөл. солк. былааннаныллыбыт. Кэлэр сылга улуус дьаһалтата СӨ Тыа хаһаайыстыбатын министиэристибэтин кытары сөбүлэһии түһэрсиллибитин кэннэ, аукцион биллэриллиэҕэ. Онон 2021 сылга үлэ барыта бүтүөхтээх», — диэн Чурапчы улууһун баһылыгын солбуйааччы Руслан Васильев иһитиннэрдэ.
Санатан эттэххэ, РФ Тыатын хаһаайыстыбата «Тыа сирин кэлимник сайыннарыы» бырагыраама чэрчитинэн Саха Өрөспүүбүлүкэтин нэһилиэнньэлээх пууннарын сайыннарыыга 600 мөл. солк. көрбүтэ. Бырайыактары талыыга кыайыылааҕынан Чурапчы улууһун бырайыага буолбута.
Чурапчы улууһун дьаһалтатын пресс-киинэ
Хаартыска: Чурапчы улууһун дьаһалтатын пресс-киинэ