Одьулууҥҥа киинэ саҥа саалата аһылынна!

Ааптар: 
Бөлөххө киир:

Бүгүн Арассыыйа киинэтин күнүгэр Саха сирин үс нэһилиэгэр киинэ саалалара аһылыннылар.  Олортон биирдэстэ Чурапчы улууһун Одьулуунугар киирдэ. Саҥа сааланы Долун диэн ааттаабыттар. 

«Сайдыс» норуот айымньытын дьиэтин дириэктэрэ Валентина Леонидовна Аржакова: «Ааспыт сыл кулун тутарыгар өрөспүүбүлүкэ күрэҕэр кыттан бастакылар истэригэр бу ситимҥэ киирэр буолбуппут. Долун диэн инникини кыайыыга кэскиллиир суолталаах тыл, онон бу киинэ саалата өр үлэлиэ диэн эрэнэбит. Күрэх усулуобуйатынан 1 мөл. солк. суумалаах тэрили «Extra Cinema» аҕалан саалабытыгар таҥан туруорда. Биһиги хос үбүлээһин быһыытынан ити сууматтан 10 %-гар сөп түбэһэр сыаналаах экраны атыылаһан туруордубут. Киинэ көрдөрөргө лиссиэнсийэни ыллыбыт. Билигин систиэмэҕэ «Пушкинскай каарта» холбонно, бу күннэргэ баан каартата холбонуоҕа. Бүгүн тургутуу бэрээдэгинэн үс сеанс босхо бэриллиэҕэ. “Пара из будущего” киинэ, онтон «Последний богатырь» мультигы уонна “Чемпион мира” киинэни көрдөрүөхпүт. «Extra Cinema» тэрилтэ уолаттара кэлэн, киинэ тэрилин биир күнүнэн таҥан бардылар, хампаанньа салайааччыта Петр Чиряев интэриниэт ситимин көмөтүнэн тустаах бырагыраамалар турууларын кэтэстэ, билигин үлэ ымпыгын-чымпыгын үөрэтэ олорор. Онон барытын бэрт эрэллээхтик үлэлэтэн, хамсатан эрэбит. Ый аайы үс саҥа киинэни көрдөрөр былааннаахпыт. Киинэ мэхээнньигэ наадата суох, сервери уонна проекторы кулууп үлэһитэ салайыаҕа уонна билиэти атыылааһынынан атын киһи дьарыктаныаҕа.

Өрөгөйдөөх аһыллыыга СӨ култууратын миниистирин бастакы солбуйааччы Владислав Левочкин кытынна. Киинэ бэтэрээнэ, 1977 сылтан 1995 сылга диэри Одьулууҥҥа киинэ мэхээнньигинэн үлэлээбит, култуура туйгуна Нина Васильевна Скрябина урут киинэни көрдөрүүгэ уонна кулуупка үлэлээбит дьон тустарынан истиҥ ахтыыны оҥордо.

Өр сылларга тыа сирин дьоно киинэ премьераларын киэҥ саалаҕа көрөртөн матан олорбуттара. Бу күнтэн ыла «Extra Cinema» ситим улам тарҕанан, тыа сирин дьоно киинэни улахан экраҥҥа астына көрөллөрүн хааччыйыахтара. 

+1
0
+1
0
+1
0
+1
0
+1
0
+1
0
+1
0