ОДьКХ миниистирэ ыйытыыларга хоруйдаата

Бөлөххө киир:

Бүгүн, муус устар 6 күнүгэр, СӨ ОДьКХ уонна энергетика миниистирэ Вячеслав Емельянов быһа эпииргэ таҕыста. Дьону долгутар сүрүн боппуруостарга — киин хочуолунай тутуутун, коммунальнай өҥөҕө субсидия көрүллүүтүн, ыраас уунан хааччыйыы, бөҕү кутар санитарнай туочукалар о.д.а. туһунан ыйытыыларга хоруйдаата.

Дьокуускай куорат Заводская уулуссатын 18-с дьиэтигэр олорор уопсай дьиэ олохтоохторо фекальнай массыына өҥө оҥорбокко иэдэйбиттэрин этиннилэр. Онуоха миниистир Вячеслав Емельянов бу боппуруоһу СЭГХ нөҥүө уонна тус бэйэтин хонтуруолугар ылар туһунан эттэ.

Эдьигээн оройуонун Бэстээҕэр киин ититии хочуолунайа тутуллан иһэн үлэҕэ киирбэтэх. Ол туһунан миниистир маннык диэтэ:

— 2021-2023 сс ГУП ОДьКХ нөҥүө улуустарга хочуолунайдар тутууларын туһунан бирикээс тахсыбыт. Өскөтүн урут бырагыраамаҕа киирэн баран ситэри тутуллубатах буоллаҕына, бу боппуруоһу өссө көрүөхпүт.

Салгыы көрөөччүлэр маннык ыйытыыны биэрдилэр: «Өскөтүн оһох оттон, чох атыылаһан олорор буоллахпына, субсидия өҥөтүнэн туһаныахпын сөп дуо?»

— Өскөтүн, дьиэ кэргэн дохуотун 15% элбэх оттукка барар буоллаҕына, бу ыал субсидия өҥөтүнэн туһанар кыахтаах. Субсидия ааҕыныстыбата бу кэккэ боппуруостарга үлэлэһэр.

Ыраас уунан хааччыллыы бырагыраамаҕа  ханнык улуустар хапсаллар?

— «Ыраас уу » эрэгийиэннээҕи бырагыраамаҕа  улуус нэһилиэктэриттэн сайаапка киириэхтээх. Бу бырайыагы сайыннарыан сөптөөх нэһилиэги кытта үлэлэһэбит.

Ульяна Захарова.

+1
0
+1
0
+1
0
+1
0
+1
0
+1
0
+1
0