Өрөспүүбүлүкэҕэ Бүлүү бөлөх, киин уонна илин эҥээр улуустарын итиинэн «СӨ ОДьКХ” ГУП хааччыйар. Онон бу тэрилтэ Саха сирин хомунаалынай хаһаайыстыбатыгар биир сүрүн тэрилтэнэн буолар. Тэрилтэ пресс-сулууспата иһитиннэрбитинэн, бүгүҥҥү туругунан, тустаах тэрилтэ эбийиэктэриттэн 90 %-нара кэлэр кыстыкка үлэлииргэ толору бэлэмнэр.
Бүгүҥҥү күҥҥэ Аллайыаха, Анаабыр, Булуҥ, Аллараа Халыма уонна Өлөөн улуустарыгар хайыы-үйэ оттук сезона саҕаланан, хочуолунайдар үлэлээтилэр. Бу улуустарга уруккуттан оттук сезона эрдэ саҕаланар аналлаах. Атырдьах ыйын бүтэһик күннэригэр хотугу уонна Арктика улуустарыгар барыларыгар оттук сезона толору саҕаланыаҕа. Тустаах тэрилтэ анал бирикээһинэн, балаҕан ыйын 11 күнүгэр диэри киин, илин эҥээр уонна Бүлүү бөлөх улуустарыгар хочуолунайдар итиини биэриэхтэрэ. Атырдьах ыйын 24 күнүнээҕи туругунан, итиинэн хааччыйар эбийиэктэргэ 86 хочуол, 79 анал носуос, 50 араас хабааннаах оборудование саҥанан солбуллан уларытыллыбыттар. Итини тэҥэ, 50 км уһуннаах инженернэй ситим саҥардыллан оҥоһуллубут.
«СӨ ОДьКХ» ГУП генеральнай дириэктэрэ Виталий Чикачев: «Итиинэн хааччыйар эбийиэктэргэ, ититэр ситимҥэ сөптөөх хапытаалынай өрөмүөнү кэмигэр тэрийэн ыытыы сайыҥҥы кэмҥэ биһиги тэрилтэбит сүрүн үлэтинэн буолар. Манна, төһө кыалларынан, сөптөөх болҕомтону уурабыт. Билиҥҥи туругунан 2021-202 сс. кыстык сезонун этэҥҥэ туоруур инниттэн ылыныллыбыт былаан үксэ олоххо киирдэ. Биир тылынан этэр буоллахха, былааны толордубут. Өрөмүөн үлэтэ кэмигэр уталытыллыбакка түмүктэнэрэ аны кыһыҥҥы томороон тымныылары мүччү түһэрбитигэр улахан көдьүүстээх буолара чуолкай», – диэн иһитиннэрдэ.
Бары билэрбит курдук, билигин уу суолунан оттугу тиэйии күүскэ бара турар. «СӨ ОДьКХ» ГУП 427,7 тыһ. туонна оттугу улуустарга тиэрдиэхтээх. Билиҥҥи туругунан, 259,5 тыһыынча туонна уматык уонна 220,5 тыһыынча таас чох аналлаах аадырыстарын этэҥҥэ булбуттар.
Быһыыны ылыы
Билигин коронавирус дьаҥыттан харыстанар инниттэн быһыыны биэрии күргүөмүнэн ыытыллар. Бу тэрээһинтэн тустаах тэрилтэ эмиэ туора турбат. Бүгүҥҥү туругунан, «СӨ ОДьКХ» ГУП исписэлиистэриттэн 79 %-нара быһыыны ылбыттар.