Уопсастыбаннай инфраструктураны сайыннарар күрэскэ кыттыҥ, субсидиянан туһаныҥ
Тохсунньу 15 күнүгэр СӨ үбүн миниистирэ Валерий Жондоров ааспыт сыл түмүгүнэн таһаарыылаахтык үлэлээбит суруналыыстары Бэчээт күнүнэн эҕэрдэлээн туран, үп-харчы эйгэтигэр 2018 сыл түмүктэрин таһаарда уонна 2019 сылга туох сүрүн соруктар баалларын билиһиннэрдэ.
edersaas.ru
Кини өрөспүүбүлүкэ иһигэр оҥоһуллубут табаар, өҥө сыаната, ол эбэтэр валовай региональнай бородууксуйа эбиллэн иһэрин бэлиэтээтэ. Маныаха дьоһун кылааты сир баайын хостооһун, бырамыысыланнас тэрилтэлэрэ киллэрэллэр. Холобур, быйыл кыһыл көмүһү хостооһун 28 туоннаҕа тиийэн, Сэбиэскэй кэм көрдөрүүтүн куоһарыахтаах.
Сахабыт сиригэр үлэлиир ОДьКХ 106 тэрилтэтэ 2018 сыл түмүгүнэн 35 миллиард солкуобай үбү киллэрдэ.
Итиэннэ 2017-2018 сылларга муниципальнай тэриллиилэргэ общественнай сирдэри тупсарыыга олохтоох дьон туруорсуутун, кинилэр көҕүлээһиннэрин үбүлээһин көхтөөхтүк ыытылынна. Нэһилиэнньэ бэйэтэ талбыт бырайыактарын олоххо киллэрэргэ былырыын 500 мөлүйүөн солкуобай көрүллүбүтэ. Ити суумаҕа олохтоох бүддьүөт көмөлөһөн, тастан үбүлээччилэр көстөннөр, уопсайа 694,2 мөлүйүөн солкуобай суолу өрөмүөннүүргэ, оҕо оонньуур уонна спордунан эрчиллэр былаһааккаларын, дьон сынньанар сирин тутарга, уулуссалары сырдатарга, ититиини, уоту, гааһы тардарга, уунан хааччыйарга о.д.а. туттуллубута.
Быйыл эмиэ бу үтүө бачыым салҕанан, общественнай инфраструктураны сайыннарарга СӨ Үбүн министиэристибэтэ тохсунньу 10 күнүттэн олунньу 8 күнүгэр диэри күрэскэ кыттарга муниципальнай тэриллиилэртэн сайаапка хомуйар. Кыайбыт дьон бүддьүөттэн субсидия ылан, нэһилиэктэрин олоҕун тупсарарга туһуламмыт бырайыактарын олоххо киллэрэр кыахтаныахтара. Итиниэхэ 2019 сылга 500 мөлүйүөн солкуобай көрүлүннэ.
Тыа сиригэр уонна куораттарга биир бырайыагы үбүлүүргэ 500 тыһыынча солкуобайтан саҕалаан, 1,5 мөлүйүөҥҥэ тиийэ субсидия бэриллиэҕэ. Оттон муниципальнай оройуоннарга уонна куорат уокуругар 1,5-3 мөлүйүөн солкуобай тыырыллыаҕа.
Сайаапканы биэрии усулуобуйатын сиһилии ppmi.sakha.gov.ru сайтка киирэн билсиэххитин сөп.
Оччотугар общественнай сирдэри тупсарарга, саҥа сквер тутарга, суолу өрөмүөннүүргэ, тыа сиригэр эргэ кулууптары саҥардарга үп-харчы көстүөн сөп. Бастатан туран, туох наадалааҕын олохтоохтор бэйэлэрэ быһаарыахтара.
Оттон Үп министиэристибэтэ 2019 сылга бүддьүөт бигэ туруктаах, дьоҥҥо өйдөнөр уонна аһаҕас буоларын, ону таһынан, дохуоттаах чааһа улаатарын туһугар ылсан үлэлиэҕэ.
Марианна ТЫРТЫКОВА, «Саха сирэ» хаһыат, edersaas.ru